PGL – Ameaçada a sua continuidade depois da perda de apoios económicos governo, o Ateneu Ferrolám celebrará o 19 prémio internacional de gaita galega Constantino Bellón que terá lugar nos dias 8 e 9 de novembro no Teatro Jofre de Ferrol.
O adiamento produziu-se depois de que a Secretaria Geral de Emigraçom da Junta lhe retirasse o apoio económico e institucional. Afinal, a ajuda da Cámara de Ferrol e da Deputaçom da Corunha fizo possível a realizaçom do concurso.
Os organizadores, que nom compreendem as razons do actual Governo para retirar as ajudas, asegurárom que a situaçom deste ano «nom se volverá repetir», posto que já estám a buscar patrocinadores para a XX ediçom. Nesta linha, Fernández Gabeiras, presidente do júri, apontou que «se algo tem o Bellón é que cumpre com as suas tradiçons».
Este ano, afinal, começará no dia 9 às 20h30 e incluirá a entrega do Prémio de Composiçom para Gaita Galega Solista, que receberá Jesús Rodil Rodríguez, e entregarám-se dous accésits a Pablo Devigo e Javier María López Rodríguez. Ainda terá lugar a entrega aos finalistas de umha figura de Sargadelos e dos diplomas de participaçom.
Desde 2004 convoca-se também o Concurso de Composiçom para Gaita Galega Solista e desde 2008, o Prémio Seivane, que consiste numha gaita fabricada e personalizada especialmente para a convocatória e que se concede àquele participante que, a segundo o júri, melhor represente a imagem tradicional do gaiteiro galego. Para Fernández Gabeiras, «este presente representa para os Seivane um esforço económico maior que o que realizava Emigraçom».
+ Ligaçons relacionadas:
- Comunicado da Junta Directiva do Ateneu Ferrolám a respeito do Prémio ‘Constantino Bellón’ [PGL, 02/09/2009]
- Comunicado do júri do prémio de gaita ‘Constantino Bellón’ [PGL, 25/08/2009]
