PGL – Aos poucos, mais sectores vam-se somando à iniciativa do sindicato CIG de convocar umha greve no ensino pola próxima derrogaçom do actual Decreto 124/2007 sobre a presença da nossa lingua no sistema educativo.
No vindouro dia 30 o Conselho da Junta tratará a questom, e nessa data será que se poda conhecer qual é a alternativa do Governo de Alberto Núñez Feijóo nesta matéria, um dos pontos mais quentes do seu mandado e para o qual situou Anxo Lorenzo ao frente da Secretaria Geral de Política Lingüística.
Para a CIG, o possível anúncio do rascunho do novo texto nestas datas exemplificaria “mais umha vez” a “aleivosia” com que a Conselharia da Educaçom está a proceder, utilizando “sem pudor” as férias para anunciar ou aplicar “aquelas questons que sabe que som controversas, procurando que as suas decisons tenham a menor contestaçom possível”.
Se a Junta mantiver o calendário previsto, a CIG promoverá umha greve no ensino galego, e estudam como data quinta-feira 21 de janeiro de 2010. Com esta convocatória procurará-se dar contestaçom “a esta nova agressom” da Junta no sentido de “pretender reduzir os direitos das galegas e dos galegos, e muito especialmente os das geraçons mais novas, reduzindo o seu contacto com o nosso idioma”.
Apoio de AGIR
Através de um comunicado, AGIR anunciou a “plena disponibilidade” para somar forças “com todos os sectores e colectivos da escola galega” que promovam umha jornada de greve. O sindicato estudantil da esquerda independentista assegurou que porá “todos” os seus esforços para o sucesso dessa jornada “qualquer que for o dia”, e reclamará “a plena galeguizaçom da escola pública e o reintegracionismo como normativa para umha língua de futuro”.
+ Ligaçons relacionadas:
- Suspeitam que novo decreto de galego sairá em férias [PGL, 21/12/2009]
- Os cálculos de Feijóo: Anxo Lorenzo e o pacto de Láncara [PGL, 08/12/2009]
- Anxo Lorenzo, demite [artigo de Celso Álvarez Cáccamo; PGL, 30/11/2009]
- Sobre a destruição do galego (I) [artigo de Fernando V. Corredoira; PGL, 02/11/2009]
