PGL – Após a disponibilizaçom na rede de forma gratuita e em formato de fácil leitura da História da Língua em Banda Desenhada, da Artábria acabam de fazer o mesmo com o imprescindível Manual de Iniciaçom à Língua Galega, do professor Maurício Castro.
A obra tinha sido editada em papel no ano 1998 pola própria Fundaçom Artábria e, depois de se ter esgotado, em 2006 foi recuperada numha ediçom especial em pdf, revista e acrescentada, com a colaboraçom da AGAL.
O manual do professor Castro Lopes é umha ferramenta didáctica fundamental, fácil de ler e de grande valor ao nos apresentar nom apenas os aspectos mais importantes da gramática galego-portuguesa (morfosintaxe, ortografia e léxico), como também os mais interessantes contributos da sociolingüística aplicada ao caso galego.
Tal qual se recolhe no ‘Prefácio’ da ediçom em papel de 1998 «O Manual está pensado para pessoas que partem já de umha consciência favorável à língua, umha motivaçom que até hoje nom achava no mercado editorial o instrumento que lhe permitisse achegar-se ao conhecimento do galego de maneira autodidáctica sem ter que converter-se num especialista».
A estrutura temática do Manual
O livro está dividido em oito grandes temas, nos quais, em termos gerais, se apresenta umha parte de gramática, com um interessante anexo lexical, e umha outra de sociolingüística. Tudo de umha maneira simples e muito amena, fugindo das aridezes com que estes temas som tratados, na maior parte das vezes, nos prontuários e gramáticas ao uso.
Ainda, o Manual acrescenta, ao final do mesmo, dous apêndices relativos ao verbo e outros paradigmas. Ao todo, 132 páginas que abrigam um instrumento de grande ajuda para nos iniciarmos na nossa língua, com as razons essenciais para a defesa da sua concepçom lusófona, universalista e galega.
Como dizíamos no lançamento da ediçom digital, este manual ajuda a desmitificar o medo com que muito pessoal bate quando se inicia na língua, e espoleta a procura polo seu aperfeiçoamento posterior através de manuais ou gramáticas mais alargadas, além dos cursos de galego e o fundamental contributo das aulas de português nas Escolas de Línguas da Galiza.
O autor
O professor Maurício Castro Lopes (Ferrol, Transancos, 1970), é licenciado em Filologia Galego-Portuguesa pola Universidade de Santiago de Compostela e actualmente trabalha como professor de Português na Escola Oficial de Idiomas da Corunha.
Associado pola primeira vez à AGAL em 1990, foi o primeiro porta-voz do MDL, presidindo também a Fundaçom Artábria de Trasancos durante a sua primeira etapa.
Activo participante no movimento normalizador reintegracionista, é autor de diversos trabalhos sobre temática lingüística e sociolingüística galega, tais como a História da Galiza em Banda Desenhada (1995), Manual de Iniciaçom à Língua Galega (1998) [ediçom esgotada], ou Galiza e a diversidade lingüística no mundo (2001), além de artigos e colaboraçons em publicaçons periódicas como Abrente ou Agália, e diversos meios na internet.
Em passado dia 22 de Abril de 2006, o Plenário da Comissom Lingüística da AGAL elegeu-no como novo membro da Comissom, numha reuniom ordinária realizada em Santiago de Compostela.
Descarregar em PDF [3.5 MB]
+ Notícias relacionadas:
- Maurício Castro: «O conhecimento e interesse polo reintegracionismo está hoje mais estendido socialmente» . Velho PGL, 07 de Setembro de 2006.
