Compa Campoi – O Festival Internacional de Marionetas e Formas Animadas de Lisboa acolheu o passado 19 de maio a pré-estreia da longametragem documental Morreu o demo, acabou a peseta, do realizador galego Pedro Solla.
O filme foi selecionado polos organizadores do festival como um complemento ideal à programaçom do Festival nesta ediçom número 12, dedicada à tradiçom europeia de bonecos de luva, dos que Barriga Verde é um representante ainda mal conhecido.
O documentário é umha viagem por Europa com base na Galiza e o projeto de recuperaçom da Barraca de Barriga Verde empreendido pola companhia Viravolta Títeres. Durante o percurso da sua pesquisa, os titereiros galegos descobrem que Barriga Verde, o personagem criado em 1910 por José Silvent, tem muitos parentes na Europa. A começar por Dom Roberto, o fantoche tradicional do Norte de Portugal que provavelmente serviu de inspiraçom a Silvent, mas sem esquecer a tradiçom dos Cristovos e dos cegos monifrateiros, preexistente na Galiza, passando polo Punch inglês, que acaba de cumprir os 350 anos, o Guignol que difundiu as reivindicaçons operárias no Lyon do século XIX e chegando ao Nápoles de Pulcinella, provavelmente o pai de todos eles.
A constataçom do eixo comun que vincula toda esta riquíssima tradiçom europeia fascinou a audiência que assistiu à projeçom do filme na Galeria Boavista de Lisboa, muito próxima do Museio das Marionetas de Lisboa, onde ainda nom há uma vitrina dedicada a Barriga Verde, mas nom há tardar.
As pessoas do público destacárom o valor divulgativo do filme e a necessidade de ser difundido em Portugal e o Brasil. Polo momento, o filme será apresentado em Celeiro de Marinhaos, lugar de acolhida de muitos artistas ambulantes durante a primeira metade do século XX, o vindouro 29 de junho. Também está prevista a sua emissom pola TVG.
