A Associaçom Galega da Língua (AGAL) ultima preparativos para a leitura continuada do romance Scórpio de Carvalho Calero que se realizará no próximo fim de semana. No ano passado esta leitura suspendera-se no mesmo dia em que se ia realizar, devido ao fecho perimetral das cidades galegas pola situaçom pandémica. Este ano será no dia 31 de outubro, no dia seguinte ao 111 aniversário do seu nascimento. Após estudar as circunstâncias sanitárias atuais, a associaçom decidiu que era o momento de realizar a homenagem e garante que o desenvolvimento da mesma se realizará com toda a segurança para as pessoas que decidam prestar tributo ao grande pensador do reintegracionismo.
Como se sabe, durante o ano 2020, a AGAL anunciara uma leitura continuada do romance Scórpio como ato central do ano das Letras Galegas dedicado a Ricardo Carvalho Calero. Por desgraça, o evento nom se puido levar a cabo fisicamente, nem na primeira data prevista (16 de maio de 2020) nem na segunda (30 de outubro de 2020), por mor da pandemia. Porém, a AGAL “nom quer deixar de prestar a devida homenagem ao professor Carvalho Calero” e, segundo anunciou o seu presidente, este ano “a leitura continuada também se vai realizar num dia muito simbólico, 31 de outubro de 2021, o seguinte ao 111 aniversário do seu nacimento”.
O evento dará seguimento à leitura em vídeo realizada o ano passado para eludir a pandemia, e projetará-se no Salom Nobre da USC entre as 9h e as 12h. A continuaçom, no mesmo espaço, lerám-se os 250 leitores e leitoras restantes, desde as 12h da manhã às 8h30 da noite, aproximadamente. Como no ano passado, as primeiras leituras físicas estám reservadas à família do autor (filhas e netos) e às autoridades políticas e académicas, como o reitor da USC Antonio López e o secretario xeral de Política Lingüística Valentín García. Junto com a AGAL e com a Universidade de Santiago de Compostela, que cederá o espaço para levar adiante o evento, colaboram no desenvolvimento do mesmo a Deputaçom da Corunha, o Concelho de Santiago de Compostela, e, de forma muito destacada a Secretaria Geral de Política Linguística da Junta da Galiza.
Entre os leitores anotados neste momento encontram-se outros destacados cargos políticos, como Anxo Lorenzo, Director Xeral de Cultura, Maria del Carmen Martínez Ínsua, Diretora Geral do Património Cultural; líderes locais como Goretti Sanmartín (BNG), Mercedes Rosón (PSOE) e Borja Verea (PP) e deputadas e deputados como Paulo Prado (PP), Noa Díaz (PSOE) ou Néstor Rego (BNG).
Presente
As 250 pessoas participantes na leitura continuada obterám de prémio um exemplar numerado da ediçom limitada do Scórpio, editado con desenhos de cada um dos narradores realizados por Rosa de Cabanas ex professo para a Leitura Continuada.
Como participar? Prenchendo o seguinte formulario en liña:
https://carvalho2020.gal/leitura-continuada/.
A leitura poderá ser seguida ao vivo no youtube:
https://www.youtube.com/c/AtravésProdutora/live
