PGL – A 27 de outubro terá lugar em Compostela um lançamento do Sempre em Galiza. Será às 19h na Biblioteca Ánxel Casal (r/Joám XXIII) e intervirám Miguel R. Penas (diretor da editora), Fernando V. Corredoira (responsável pola adaptaçom) e os autores de dous dos prólogos, Francisco Rodríguez e Camilo Nogueira.
Graçás à ATRAVÉS|EDITORA, que a publica na coleçom ATRAVÉS|DE NÓS, a obra magna de Daniel Castelão apresenta-se agora na sua primeira versom na norma internacional portuguesa. Umha ediçom fruto do de professor Fernando Vásquez Corredoira, autor da adaptaçom, que contou com a colaboraçom de Ernesto Vásquez Souza para as notas a rodapé.
Miguel R. Penas, vice-presidente da AGAL e diretor da ATRAVÉS | EDITORA, afirma que estas anotações tornam a ediçom na mais completa e na mais útil para entender a obra no seu contexto sócio-político e histórico. Penas explica, ainda, que o Sempre é «um dos alicerces ideológicos em que se apoiou o nacionalismo galego para se reconstruir após a barbárie fascista que começou no ano 1936, e da qual ainda hoje padecemos conseqüências bem diretas na Galiza».
Capa da ediçom, a mais completa nunca publicada
O diretor da ATRAVÉS indica às e aos leitores da Galiza e de Portugal que devem reparar em que estamos diante da obra que compila e mostra a amplitude do pensamento político de Castelão. «Umha figura totalmente desbordante da Galiza do século XX», porque Castelão, junto a Rosalia de Castro, «som duas personagens que escapam do plano meramente cultural, literário ou político para se tornarem em dous mitos populares galegos, isto é, duas figuras assimiladas totalmente polo imaginário coletivo do povo galego».
O livro acompanha-se de umha separata, Sempre Castelao, no qual tomam a palavra umha série de pessoas que som boa mostra da herança política que Castelão deixou ao povo galego. Destas, duas estarám a 27 de outubro no lançamento. Camilo Nogueira, sócio de honra da AGAL, um dos redatores do anteprojeto de Estatuto de Autonomia de Galiza de 1981 e primeiro eurodeputado do Bloco Nacionalista Galego (BNG) de 1999 a 2004; e Francisco Rodríguez, especialista em autores galegos como Curros Enríquez ou Rosalia de Castro, membro da Executiva do BNG e deputado no Congresso espanhol de 1996 a 2008.
O resto dos textos de apresentaçom correspondem a Xosé Manuel Beiras, economista, porta-voz nacional do BNG desde a sua fundaçom em 1982 até 2003 e porta-voz no Parlamento do BNG de 1985 até 2003; Margarita Ledo, catedrática de comunicaçom audiovisual da Universidade de Santiago e diretora do semanário A Nosa Terra de 1977 a 1980; Encarna Otero, professora de História e vice-presidenta do Concelho de Santiago de Compostela de 1999 até 2003; e Luís Gonçales Blasco ‘Foz’, membro da comissom linguística da AGAL e da Academia Galega da Língua Portuguesa; som vozes o suficientemente autorizadas para nos achegarem a figura de Castelão e a sua obra.
+ Ligações relacionadas:
