PGL – Júlio Pardo de Neyra, professor da Universidade da Corunha, departirá umha palestra a 16 de novembro dentro do ciclo «Língua, Literatura e Naçom» que organiza a Agrupaçom Cultural ‘O Facho’. O tema da sua intervençom, «A gestaçom da literatura infantil galega».
O professor Pardo de Neyra, é doutor em Filologia Galega e em História Contemporânea. Foi professor da Universidade de Santiago, posteriormente da Universidade da Estremadura, e atualmente é docente na Universidade da Corunha. É autor de umha trintena de livros, entre os quais destacam ensaios centrados no vanguardismo galego, no republicanismo, no erotismo e na pornografia literária, na literatura da Galiza barroca e no feito trovadoresco medieval.
Pardo de Neyra tem participado em muitos congressos, tanto na geografia nacional como estatal, e mesmo fora das fronteiras do Estado espanhol. Umha das suas preocupaçons investigadoras centra-se no estudo da literatura infantil galega, umha literatura para nenos e nenas que se viu influenciada de perto pola política mais progressista da Irmandade da Fala da Corunha, que será o eixo central do seu relatório no Facho.
Como em anteriores conferências organizadas polo Facho, este ato terá lugar às 20 horas no local da Fundaçom Caixa Galiza, no Cantom Grande da Corunha.
