PGL – Esta quinte-feira, dia 15 de Abril, às 20 horas, José Manuel Barbosa falará na Fundación CaixaGalicia dentro do ciclo Língua, Literatura e Naçom organizado pola Agrupaçom Cultural O Facho. A sua conferência tratará do surgimento da língua galego-portuguesa no noroeste peninsular.
Além da sua actividade como docente, escritor e historiador, José Manuel Barbosa Álvares (Ourense, 1963), é sócio da Associaçom Galega da Língua desde 1984, de cujo Conselho é membro desde há vários anos. Ainda, desde 2008 é académico da AGLP e é colaborador em diferentes publicaçons periódicas galegas e portuguesas.
Barbosa tem atrás de si muitos anos de grande trabalho em prol da língua galega, quer como professor em cursos de língua galega (em normativa reintegracionista), quer no ámbito mais estritamente ligado com o activismo social. Por exemplo, foi o organizador do I Ciclo de Cultura Galega, na seqüência da qual decorrêrom as I Jornadas de História da Galiza em 2003 (reeditadas com sucesso neste ano).
Entre as suas obras publicadas destacam o Curso Prático de Galego, Ámago/Mágoa, Bandeiras da Galiza ou o mais recente Atlas Histórico da Galiza.
Disponibilizado áudio da palestra de Carlos Taibo
Por outra parte, do Facho já disponibilizárom no seu blogue o áudio da conferência de Carlos Taibo sobre o estado e o nacionalismo espanhol, umha palestra que tivo lugar no passado dia 2 na seqüência do ciclo Economia, História e Realidade Social.
Carlos Taibo, começou a sua intervençom lembrando que há três anos um grupo de quinze professores coordenados por ele tentárom publicar um livro sobre o nacionalismo espanhol. O texto foi remetido para meia dúzia de editoriais de sona, as quais o rejeitárom por descomedido, acabando por ser publicado por umha pequena editora. Esta anedota serviu-lhe para expor a censura que envolve o nacionalismo espanhol, do mesmo jeito que, expujo, os convites para falar desta forma de nacionalismo «contam-se com os dedos de umha mao».
+ Ligaçons relacionadas:
- Descarregar palestra de Carlos Taibo [MP3, 11MB]
