PGL – Nos próximos dias 7 e 8 de Fevereiro Compostela acolherá a terceira ediçom do encontro do asociacionismo juvenil da Galiza e o Norte de Portugal, tomando o revezamento do Porto e Vila Nova de Famalicão, sedes das duas primeiras ediçons.
Segundo a organizaçom do evento, estes encontros «tenhem o objectivo de criar um espaço onde compartilhar realidades, experiências, problemas e soluçons comuns no mundo associativo e reduzir as distáncias entre realidades semelhantes e próximas».
Quanto a Mostra, o Espaço Exposiçom estará virado para que cada associaçom juvenil exponha e compartilhe as suas ideias, as suas actividades e os seus projecto de futuro, com diversos postos destinados a divulgar esses projectos e actividades. Igualmente, haverá um palco aberto à participaçom dos grupos que quiserem actuar diante dos visitantes.
Por outra banda, o Espaço Multimédia estará voltado para a exposiçom de trabalhos de criaçom e divulgaçom realizados por rapazes e raparigas dos dous lados do Minho.
Quanto a Encontro, haverá a oportunidade de fazer convívio, relacionar-se e festejar com os moços e moças associadas. Destarte, estám agendados diversos Seminários formativos e de reflexom sobre a elaboraçom de projectos conjuntos e sobre a vida associativa; bem como um grande Concerto para o sábado noite. Igualmente estám programadas actividades variadas de animaçom.
O alojamento é gratuito para as associaçons juvenis interessadas que se inscreverem com anterioridade ao dia 27 de Janeiro. Este Encontro Mostra do Associacionismo Juvenil conta com o apoio de diversas instituiçons da Galiza e do Norte de Portugal.
