Galizalivre.org / PGL – Em colaboraçom com a Área de Movimentos Sociais da Escola Popular Galega, Galizalivre.org edita o livro Todas as guerras, umha recompilaçom de artigos do filósofo e militante da esquerda Santiago Alba Rico.
Este pensador colabora habitualmente com meios comunitários galegos, como o Novas da Galiza, mas é a primeira vez que se edita em formato de livro parte da sua obra. Os artigos publicados neste livro fôrom traduzidos por Beatriz Peres Bieites, e fôrom tomados de vários meios comunitários de distintos pontos do planeta.
Nado em Madrid e residente no Tunes, Santiago Alba tem dedicado a sua pluma à solidariedade activa com a causa árabe, a revoluçom cubana ou a esquerda na América Latina. No Reino da Espanha, dedica os seus esforços a estudar a mudança antropológica que o capitalismo tecnológico e de consumo está a introduzir nas nossas sociedades. A um tempo, tem mostrado a sua solidariedade com processos de emancipaçom nacional como o basco ou o galego.
O livro pode-se solicitar ao correio da Escola Popular: escolapopularnacional(arroba)gmail.com.
Apesar da distáncia
No limiar da obra assinala-se a importáncia da internet para se poder aproximar a pessoas como Santiago Alba Rico. Este meio, «que tanto favoreceu o isolamento físico da gente, o amoreamento assistemático de dados e a ficçom da telemilitáncia», explica-se, tivo a «virtude» de nos aproximar «a plumas como estas».
Destarte, no meio da «chuva de informaçons que padecemos, que derivam sempre em pensamentos e acçons confusas, umha pequena comunidade de leitores e militantes soubo dar com o mais certo», que neste caso é «aquele pensamento que orienta no caos e alimenta, modestamente, umha intervençom que incida no mundo».
Em entrevista recente para o Galizalivre.org, com motivo precisamente da ediçom desta escolma de trabalhos, Alba Rico fala nom apenas de questons que se recolhem no trabalho, mas também de temas de actualidade —como a expulsom de ciganos da França— e outros temas um bocado mais atemporais —as luitas pola emancipaçom nacional ou as críticas ao capitalismo atroz—.
+ Ligaçons relacionadas:
