PGL (*) – Que o castelhano é a língua habitual da maior parte de trabalhadores e trabalhadoras da CRTVG nom é segredo nenhum, como tampouco o é que a qualidade do galego empregue costuma ser também muito baixa, especialmente em secções como os desportos. Ligado com isto, é também notória a dependência do galego-TVG a respeito do castelhano, como provam alguns exemplos que coletámos nos últimos meses.
1) O presidente do Celta, entrevistado em castelhano
Umha das dependências mais graves que detetámos nos últimos meses deu-se a 7 de junho, quando umha repórter da televisom pública galega, a qual tem a obriga de fomentar o uso da nossa língua, entrevistou em castelhano o presidente do Real Clube Celta de Vigo, Carlos Mouriño (Vigo, 1943).
{youtubejw}HbknZHSDNr8{/youtubejw}
2) Web de Renfe, em castelhano
A 18 de junho noticiou-se o assinamento de um convénio entre Comboios de Portugal e a empresa espanhola Renfe. Nas imagens com que a acompanham, observa-se como se usa a versom em castelhano do website de Renfe apesar de existir umha em galego e de Comboios de Portugal oferecer umha informaçom mais completa.
{youtubejw}IRYmLGsdF38{/youtubejw}
3) Willie Nile: do inglês para o castelhano
Um outro exemplo de gravidade similar ao primeiro. A 9 de maio, o espaço A Revista da TVG entrevistou o músico Willi Nile. As suas declarações —exceto saudações e algumha frase feita— fôrom em inglês. Porém, a traduçom, que devera ser em galego, foi realizada ao vivo em castelhano.
{youtubejw}SVzQRt4R1QA{/youtubejw}
4) Deturpaçom de toponímia galega
Na faixa oriental do Principado das Astúrias, na comarca situada entre os rios Eu e Návia, fala-se a língua galega. De facto, boa parte da sinalética local conta com versões em galego —ali denominado ‘galego-asturiano’ polas autoridades— e castelhano. Contudo, a TVG utiliza decote a toponímia deturpada em informações relacionadas com essa comarca, o qual contrasta com a galeguizaçom sistemática de toponímia castelhana, como já se denunciou no Portal há três anos. A 17 de julho deste ano, numha informaçom sobre o setor naval, uma equipa da TVG deslocou-se até a localidade eu-naviega Figueiras —ao pé de Riba d’Eu, na Marinha—, mas na locuçom e textos fala-se de «Figueras», utilizando assim o topónimo deturpado em castelhano.
{youtubejw}lSq2HtPXetM{/youtubejw}
5) Um rei belga com nome em castelhano
Em finais de julho a TVG informou da coroaçom do novo rei da Bélgica, Philippe (em francês) / Filips (em neerlandês), isto é, Filipe. Porém, tanto na locuçom como nos textos aparece «Felipe», adaptaçom para o castelhano do nome do monarca belga. Trata-se de umha dependência comum também a informações que atingem membros de outras famílias reais europeias.
{youtubejw}SRHCg7o-Y7Q{/youtubejw}
(*) Informaçom realizada com a colaboraçom de Xián Neto
