J. Alberte Corral – O vindouro dia 10 de Dezembro, quarta-feira, o Editor e Dramaturgo Francisco Pillado Mayor falará na Corunha dentro do ciclo, Literatura e Naçom, organizado polo Facho. A sua charla versará sobre: Aspectos da consideraçom da mulher no decorrer da História.
No seu longo percurso cultural Francisco Pillado Mayor foi promotor dos grupos de teatro O Facho (1965), Escola Dramática Galega (1978), Luís Seoane (1980) e de Elsinor Teatro (1990). Em 1965, montou, para o grupo de teatro d’O Facho, um espectáculo baseado em textos de Castelao e Luís Pimentel. Com esta representaçom fijo a sua apresentaçom pública o grupo teatral da nossa Agrupaçom, sendo o mesmo um dos primeiros grupos de teatro galego durante a tirania franquista. Durante vários anos ocupou a presidência da Escola Dramática Galega.
É coautor de Textos pra o ensino do Galego, O Teatro Galego, Antoloxía do teatro galego, Diccionário do teatro galego 1671-1985, Conversas em Compostela com Carvalho Calero e A nación incesante. Conversas com Xosé Manuel Beiras. Asimesmo, é autor de numerosas traduçons teatrais.
Também foi director de Cadernos da Escola Dramática Galega, Cadernos do Espectáculo da Companhia Luís Seoane, Colecçom Castrodouro-Teatro, Colecçom Arlequín, Ediçons Laiovento, Livros Elsinor Teatro, Cadernos de Teatro e da Revista de Teatro Casahamlet. Em 1981, recebe um prémio da Aula de Teatro da Universidade de Santiago de Compostela polo trabalho sobre o Teatro de Luís Seoane, realizado em colaboraçom com Manuel Lourenço. Em 1989, é galardoado com o Prémio da Crítica polo seu labor como director dos Cadernos da E.D.G. Em 1993, recebe o Prémio Compostela de Honra polos Cadernos de Escola Dramática Galega
Em colaboraçom com a Associaçom de Solidariedade Galego-Cubana “Curros Enriques” publicou a traduçom do livro Un grao de millo, Conversa de Fidel Castro com Tomás Borge.
