PGL – A Fundaçom Artábria denuncia a exclusom dos grupos musicais que utilizam a língua galega das Festas de Verao que decorrem na cidade de Ferrol. Para o coletivo, trata-se de uns fastos com muito gasto em figuras televisitas, mas pouco investimento na cultura do País.
De Artábria lamentam que as festas, «como cada ano», evidenciem «a total falta de compromisso dos sucessivos governos municipais com as manifestaçons culturais e musicais existentes em Ferrol e na Galiza, expressadas na única língua própria do nosso País, o galego».
Este ano passarám pola cidade ártabra El Sueño de Morfeo, La Excepción, D’Nash, Coque Malla ou Efecto Mariposa a custa de «muitos milhares de euros que deveriam ser investidos na cultura da nossa comarca e do nosso país» que, porém, «voam para longe em troca de nos permitir assistir a concertos inspirados na pobríssima programaçom musical televisiva ou em expressons musicais sempre do mesmo ámbito cultural: o madrileno-espanhol».
Como conseqüencia deste tipo de atuaçom, «a nossa língua, o galego, fica radicalmente fora dos grandes eventos festivos do verao ferrolano». A presença do nosso idoma vê-se reduzido apenas «às migalhas que sobram do reparto de milhares de euros às figuras do panorama comercial em espanhol».
