PGL – Quarta-feira, dia 27 de junho, às 22h, a sala Iguana Club de Vigo acolhe a festa de apresentaçom da segunda ediçom do festival Minho Reggae Splash, que anualmente decorre em Vila Nova da Cerveira (Portugal) e que organiza a associaçom viguesa que dá nome ao evento.
Na festa de apresentaçom do festival atuarám os grupos Meninos Carentes e Zaramandi, e os bilhetes estám à venda por apenas dous euros.
Meninos Carentes é umha formaçom que «interpreta temas alternativos em galego-português», e fai-no com estilos tam variados como o funk, reggae roots ou dub, entre outros. Da associaçom Minho Reggae salientam que graças ao seu groove e à psicodelia dos seus diretos «nom deixam ninguém indiferente».
Por sua parte, Zaramandi, também galegos, é um grupo constituído em 2007, cujo repertório inclui roots, reggae, dub ou backing band. Já realizárom numerosos espetáculos polos mais variados cenários, bem dentro da própria banda, bem como em espetáculos de acompanhamento backing band como os realizados com Taru (Corunha) ou Ganjahr Family (Vigo). De Minho Reggae enfatizam a «cadência rítmica» como principal virtude desta banda.
Festival em Julho
O festival em si decorre os dias 8 e 9 de julho na localidade portuguesa de Vila Nova da Cerveira. Atuarám Só Matutos (Brasil-Galiza), Meninos Carentes (GZ), Sauko B&One (GZ), Little Cobra (GZ), Selassie Sound (GZ), Vinyl Bullet Sound (GZ), I Rick DJ (Portugal), Bhamule Sound (Inglaterra), Rutera (BR), One Love Family (PT), Emeterians (Espanha)
A associaçom
Minho Reggae é uma associaçom cultural formada no ano 2010 em Vigo. Um dos organizadores do festival, o galego Xoán Lois Vila, que atende pelo ‘nome de guerra’ de Macô DJ (Meninos Carentes), explica que um dos motivos polos quais a associaçom leva o nome de Minho é o facto de na Jamaica existir o Rio Minho, que atravessa boa parte do território da ilha.
+ Ligaçons relacionadas:
