PGL – Ontem faleceu em Vigo o intelectual e escritor Francisco Fernández del Riego, presidente da Real Academia Galega (RAG) entre 1997 e 2001, e derradeiro expoente vivo de umha geraçom que marcou profundamente a língua e cultura galegas, presente, como o seu bom amigo Carvalho Calero, nos principais acontecimentos do País durante o século XX.
Junto Ramón Piñeiro e Xaime Illa Couto, Del Riego ajudou a fundar a editora Galáxia no ano 1950, sendo portanto fulcral o seu labor na linha culturalista do galeguismo de meados da passada centúria. Também no seio da editora criou a revista Grial, em 1963 a qual ele próprio dirigiu nos primeiros cem números. Só três anos anos ingressara na RAG, instituiçom que presidiria entre 1997 e 2001, sucedendo Domingo Garcia-Sabell[1].
Bons amigos
Quijo a fatalidade que Fernández del Riego (Lourençá, 7 de janeiro de 1913 — Vigo, 26 de novembro de 2010) finasse justamente no ano em que a sociedade civil mais comprometida com o País celebrava o centenário do nascimento de um bom amigo seu, Ricardo Carvalho Calero. O professor Carlos Garrido, presidente da Comissom Lingüística da AGAL, assinala que Del Riego foi «dos poucos» expoentes do sistema cultural oficialista galego «que nom dérom as costas» ao insigne ferrolano. De facto, o professor Paz lembrava num artigo do ano passado o empenho do mindoniense —durante a sua etapa à frente da RAG— em conseguir que a instituiçom aceitasse dedicar um Dia das Letras a Carvalho. Infelizmente, nom o logrou, pois «só obtivo o seu voto a favor».
De esquerda a direita: Álvaro Cunqueiro, Francisco Fdz. del Riego
e Ricardo Carvalho Calero em 1963
[Fonte: Vidaslusofonas.pt]
Fora o próprio Carvalho Calero, em 1960, quem dera a réplica ao discurso de Fernández Del Riego no ato do ingresso deste na RAG[2]. O relacionamento de ambos, que já vinha de atrás —perto de trinta anos—, ficou até os últimos dias do ferrolano, como se pode comprovar em Epistolario a Fernández del Riego, que compila a correspondência de Carvalho com o mindoniense durante perto de 50 anos.
Vídeo-entrevista a Fernández del Riego
{google}1175520629810449847{/google}
NOTAS A RODAPÉ
[1] Garcia-Sabell compatibilizou a presidência da instituiçom (1987-1997) com o posto de delegado do Governo espanhol na Galiza (1981-1996).
[2] Francisco Fernández del Riego. Un País e unha Cultura. A idea de Galicia nos nosos escritores. Discurso lido o día 26 de novembro de 1960 na súa recepción na RAG. E resposta de D. Ricardo Carballo Calero (Galaxia / Real Academia Gallega. Vigo, 1973)
