O projeto educativo popular vindica o legado pedagógico das Irmandades da Fala mediante um ciclo de projeçons e um espectáculo de regueifa que começará no dia 19 de janeiro, às 19 h., no Azkue Aretoa de Lekeitio.
A iniciativa educativa social Semente, que desde a sua fundaçom em 2011 adotou como nome “Escolas de Ensino Galego” para denotar a ligaçom histórica com o empreendimento escolar instituído polas Irmandades da Fala da Corunha, anuncia o lançamento dum novo produto audiovisual visando divulgar e pôr em valor esta experiência histórica no ano do seu centenário (1923-2023). Segundo a entidade promotora, frente ao modelo educativo assimilista estatal, as Escolas de Ensino Galego constituem um exemplo de organizaçom popular para fazer efetivo o direito da infância galega a umha educaçom autocentrada –linguística e curricularmente- , laica e pedagogicamente renovadora.
O documentário, produzido por Aqueladas S. Cooperativa e co-financiado pola Deputaçom da Corunha, indaga nas motivaçons do grupo irmandinho -constituído por figuras como Ângelo Casal, Maria Miramontes, Elvira Bao e Leandro Carré– para fundar umha escola que “redimisse o povo galego da ignorância e inculcasse nas geraçons futuras a verdadeira consciência galega”. Sinala a professora Sabela Rivas que por este centro educativo gratuito, situado inicialmente na Praça Maria Pita –nº17, passariam por volta de cem crianças que receberiam o magistério de Ângelo Casal e M. Luís Acunha, assim como visitas de ilustres intelectuais da época como Castelao, que ensinaria a desenhar às crianças; Vilar Ponte ou Outeiro Pedraio que, quando olhava para os meninhos a correrem pola rua Real, via vigorar “umha esperança”.
Entre o alunado que frequentou as aulas pode-se aludir aos nomes do dramaturgo Jenaro Marinhas do Vale e, os irmaos Galám Calvete (Fernando, Jaime e Pedro; este último futuro dirigente das Mocidades Galeguistas, assassinado em 1936), assim como os militantes galeguistas Julio Pita e Fernando Suárez, entre outros. A experiência termina quando, em 1939, Ângelo Casal se desloca para Compostela ao atravessar dificuldades económicas devidas ao fracasso do jornal vespertino El Momento. A obscuridade da ditadura franquista apagaria a vida de Casal, sendo alcaide de Compostela, mas nom a memória que hoje vive no propósito fundacional da Semente: a construçom da Escola Nacional Galega.
O conhecimento desta empresa histórica, sinala a associaçom impulsionadora, constitui um espelho onde se vê refletido o presente, através dum diálogo aberto entre épocas que confluem em problemáticas semelhantes: discriminaçom linguística, centralismo educativo e menorizaçom cultural. O filme achega-se, ademais, à realidade doutros povos da Europa, como o basco, que encontrou nas Ikastolas o alicerce mais sólido para garantir o futuro da sua língua. Do mesmo modo, a fita investiga o papel dos movimentos sociais na promoçom e dinamizaçom cultural, os valores dum modelo educativo laico, feminista, galeguizador e inovador e a importância da improvisaçom oral em verso para os novos neofalantes urbanos.
Regueifa Tour: da Galiza a Euskal Herria
As Regueifeiras da Semente, -alunas da Escola de Regueifa da escola autogestionada Semente de Compostela-, estám a realizar umha gira por diferentes vilas e cidades galegas e portuguesas no seu “Regueifa Tour” e agora chegam também ao País Basco para levar a alegria de cantar à comunidade galega na Casa da Galiza, de Donosti, ademáis das atuaçons no centro social Marikobaso, de Dério e no Azkue Aretoa, de Lekeitio.
A regueifa, a cançom improvisada galega, está a viver um renascimento com um movimento sociocultural impulsado nas escolas e institutos. Assim, o objetivo do Regueifa Tour é tecer umha rede de adolescentes com a regueifa e o ativismo em defesa da língua galega como nexos de uniom.
As Regueifeiras da Semente som quatro raparigas entre 11 e 14 anos que regueifam desde sempre: som regueifeiras nativas, aprendérom a regueifar ao mesmo tempo que a falar. Reúnem-se um dia por semana para regueifar, como atividade extraescolar na Escola de Regueifa da Semente, em Compostela. Tenhem atuado em dúcias de festas e festivais, como a Regueifesta, o Enreguéifate, o Festival de Pardinhas, o Festival de Repentismo de Madeira, o Festival Internacional de Verso Popular- Festcordel, em Abanca, Portugal, a Escola de Regueifa de Carvalho ou em cursos de formaçom de professorado do CFR. Em 2023 participárom na série documental sobre regueifa “Regueifa – Freestyle” de Nós Televisión.
O espetáculo contém desde regueifa tradicional até novas influências como bases eletrónicas, jogos de humor e temas vinculados à atualidade e aos movimentos sociais. Na Semente sinalam que “nom existe melhor modo de dar a conhecer a nossa iniciativa educativa que da mao das suas alunas, o testemunho vivo de que umha educaçom feminista e transformadora é possível graças à organizaçom popular”.
