As Escolas de Ensino Galego Semente organizam jornadas de portas abertas em fevereiro e abrem o prazo de inscriçom a partir de 1 de março.
A iniciativa educativa popular, promotora de um ensino galego, renovador e laico princípia na próxima semana as suas jornadas de portas abertas sob o lema: “É tempo de sementar, com os pés na Terra”.
Estas jornadas estám pensadas como espaços de encontro e diálogo, onde as famílias poderám esclarecer dúvidas, conhecer o dia a dia das escolas e o seu projeto educativo. Os encontros decorrerám nos diferentes centros educativos da rede Semente, constituindo umha oportunidade única para conhecer de perto as instalaçons, as equipas docentes e as famílias que fam parte desta iniciativa sem fins lucrativos:
- Semente Compostela: 10 de fevereiro (16:30 h.) e 7 de março (11:30 h.).
- Semente Corunha: 28 de fevereiro (11:00 h.).
- Semente Lugo: 21 de fevereiro (11:30 h.).
- Semente Trasancos: 24 de fevereiro (16:00 h.).
- Semente Vigo: 24 de fevereiro (18:00 h.).
Umha resposta educativa a umha situaçom linguística crítica
As Escolas Semente surgem como resposta à subordinaçom do galego no Ensino Público, promovida pola Administraçom Galega, que tem provocado umha diminuiçom crítica do uso do galego na infância. No mesmo sentido, os dados do IGE (Instituto Galego de Estatística) constatam umha progressiva queda no nível competencial em galego por parte da mocidade, à diferença doutras naçons como Euskal-Herria e Catalunha, onde se constata umha tendência positiva inversa.
Face a este cenário, a Semente demonstra que é possível travar este processo apostando num modelo multilingue aditivo e inclusivo que permite a aprendizagem de segundas e terceiras línguas, como o inglês ou o castelhano, sem renunciar a um maior uso e conhecimento da língua própria do País por parte do seu alunado.
O valor deste projeto para a conservaçom da língua e cultura galegas fijo com que a entidade fosse reconhecida com os Prémios Rosalía de Castro de língua, da Deputaçom da Corunha e dos Prémios Mil Primaveras ao melhor projeto de fomento do galego na infância e/ou mocidade, da Coordenadora de Trabalhadores/as de Normalizaçom da Língua (COTENOL).
Um modelo educativo integral e enraizado no território
O projeto educativo é favorecedor de umha orientaçom educativa humanística, científica, democrática, integral e orientada à tranformaçom social. Trata-se de umha escola Km 0, pois o processo educativo nutre-se da riqueza cultural do território, num diálogo enriquecedor entre o local, o nacional e o global: “com os pés na Terra”.
O processo educativo gira em torno da criança, entendendo esta como um ser social criativo e construtor da sua própria aprendizagem. Propicia-se o desenvolvimento integral do alunado -social, afectivo, sexual, motriz, cognitivo, ético e estético- graças às aprendizagens significativas realizadas nos diversificados ambientes de aprendizagem e mediante projetos globalizados, através da mediaçom das educadoras e da interaçom com as companheiras/os.
As docentes levam em conta os diferentes ritmos, necessidades e interesses do alunado para promoverem umha aprendizagem inclusiva, ativa e cooperativa. Ademais, facilitam um achegamento significativo à contorna de cada centro educativo, onde a natureza consititui um cenário privilegiado para a experimentaçom e a aprendizagem vivencial, integrando saberes, emoçons e relaçons significativas com o meio.
Abertura do período de inscriçom
Com a abertura do prazo de matrícula a partir de 1 de março, as Escolas Semente convidam as famílias a fazer parte dum projeto educativo que coloca a infância, a língua e a comunidade no centro.
Mais informaçons podem ser consultadas em www.semente.gal.
