PGL – Por todo o país som várias as figuras que encarnam, e nunca melhor dito, o Entrudo. Os peliqueiros de Laça, os cigarrons de Verim ou as pantalhas de Ginzo som provavelmente os personagens mais conhecidos, mas há muitos mais, como os merdeiros de Vigo.
Os merdeiros eram muito populares no Vigo mais marinheiro, e eram umha representaçom das rivalidades entre marinheiros e labregos. Precisamente, as vestes pretendiam imitar as roupas dos escabicheiros, pessoas procedentes do rural que trabalhavam vaziando os poços negros da cidade para fertilizar as terras, daí a origem do nome deste personagem do Entrudo. Porém, os merdeiros exageravam os elementos e apeiros mais significativos dos escabicheiros a modo de caricatura, e nom duvidavam em zorregar com peixe podre as pessoas.
Para resgatar o merdeiro do esquecimento, Breixo Parcero e Vanessa Rodríguez realizárom o documentário Os merdeiros, a recuperaçom, elaborado com software livre, disponível gratuitamente on-line e licenciado como Creative Commons. Este trabalho pom em valor o labor realizado pola Asociaçom Etnográfica A Merdeira, cujo gérmolo está nas preexistentes Associaçom Casco Velho e A Revolta do Berbés.
Da desapariçom à recuperaçom
Segundo narra no documentário Fiz Axeitos, presidente da Merdeira, na década de ’30 do século passado «aparecem bandos da própria alcaldia proibindo a figura do merdeiro em benefício desse Carnaval de salom, de coreografia, bailes e música enlatada». A recuperaçom iniciou timidamente em 2006, luitando sobretudo contra o esquecimento a que fora submetida a figura. Atualmente já nom é um personagem desconhecido, e chama cada vez com mais força quando se aproxima o Entrudo, para recuperar o seu lugar.
Os merdeiros, a recuperaçom
{vimeo}59345611{/vimeo}
