PGL – No primeiro dia do ano novo umha nova televisom nasceu na Turquia, e nom umha qualquer, pois falamos no primeiro canal da história da Corporaçom Turca de Rádio e Televisom (TRT) a emitir em língua curda as 24 horas do dia.
O TR6 tentará minguar a audiência do canal por satélite Roj Tv, porta-voz do Partido dos Trabalhadores do Curdistám (PKK), organizaçom considerada terrorista por parte do governo de Istambul, cujas emissons se realizam a partir da Bélgica e que tem grande popularidade entre os curdo-falantes.
O governo turco e a Corporaçom Turca de Rádio e Televisom tentam dar credibilidade ao novo canal garantindo que o TRT 6 nom imporá a ideologia oficial do estado, bem a contrário, o projecto estará virado para os curdo-falantes poderem ver programas na sua língua.
O facto de bastantes intelectuais, escritores, artistas e jornalistas curdos darem apoio ao novo canal, entre eles o conhecido escritor Yachar Kemal, deixa entrever umha campanha muito bem desenhada virada para silenciar as críticas vindas do PKK, organizaçom que pede aos seus seguidores que boicotem o canal, porque acha que será umha ferramenta para turquizar os curdo-falantes.
Mas também polo lado turco há detractores do novo canal, embora justo polo contrário, pois criticam que um canal público em curdo fomentará o separatismo e malogrará a estabilidade política do estado.
O certo é que o canal já deu a andamento, e mesmo o primeiro-ministro turco, Tayyip Erdogan, dirigiu umhas palavras em curdo no momento da abertura, sendo que foi a primeira vez na história que um alto cargo turco se exprimiu nessa língua em público.
Fonte:
- International Herald Tribune: Turkey to launch Kurdish TV to take on rebels.
- Hurriyet: PM to win Kurdish hearts and minds | Kurdish TV opens but picture still fuzzy.
- Kurdish Media: Kurdish TRT channel launched against PKK.
- Press TV: 1st Kurdish TV channel for Turkey.
- Today’s Zaman: Wife of Kurdish singer hopeful about new Kurdish channel.
