PGL – Em público e em privado, numerosas pessoas manifestárom ontem surpresa polo anúncio da conversom da AGAL em partido político. Porém, como também muitas outras adivinhárom, tratava-se de umha brincadeira, que como cada 1º de Abril é a protagonista do Dia da Mentira ou Dia dos Enganos. Com esta mentira, o PGL faz dez anos celebrando a efeméride.
O Dia da Mentira, comum à Galiza e outros países lusófonos, foi progressivamente apagado até do imaginário coletivo por pressom de outra data de teor similar, os Santos Inocentes da tradiçom espanhola (28 de dezembro). No caso galego, pode-se dizer que o PGL trabalha pola recuperaçom da celebraçom desde a sua criaçom. Nom foi possível em 2002 porque o Portal arrancou num mês de maio. Porém, em 2003 surpreendeu muitas pessoas anunciando umha proposta alternativa ao reintegracionismo. Contudo, o grande sucesso chegaria só um ano depois. O livro PGL_10 relata que, trás anunciar o PGL no 1 de abril de 2004 a entrada de Isaac Alonso Estraviz na RAG, a TVG contactou o prestigiado lexicógrafo para o entrevistar polo histórico acordo que permitia a sua entrada na instituiçom.
Este ano as brincadeiras do 1º de Abril circulárom especialmente polas redes sociais. A mais elaborada corresponde à Gentalha do Pichel, que ‘filtrou’ através de um blogue anónimo um vídeo, supostamente gravado com câmara oculta no local social, em que responsáveis da associaçom ‘confessavam’ que subornaram com dinheiro e produtos gastronómicos as pessoas idosas que aparecem no documentário E há de vir o Apalpador. Da Gentalha já publicárom umha versom ligeiramente alargada do vídeo em que, no final, desvendam que era tudo umha brincadeira.
A fraude do Apalpador
{youtubejw}NZiQEmsgoT4{/youtubejw}
+ Dez anos do Dia da Mentira no PGL:
- AGAL desativará dicionário e-Estraviz [2012]
- Assinado protocolo pela receção das televisões portuguesas na Galiza… e as espanholas em Portugal [2011]
- A Junta poderia anunciar em breve a suspensom do Decretaço [2012]
- Feijóo criará a Direcçom Geral de Igualdade Cidadá, com Pousada como assessor [2009]
- RAG estuda possibilidade de se incorporar ao acordo lusófono após revolta no IKEA [2008]
- Possível fusom do PGL e o portal da Mesa [2007]
- PGL na corda bamba [2006]
- Junta da Galiza aposta polo bi-normativismo para o galego [2005]
- Isaac Alonso Estraviz entrará na RAG fruto de um acordo entre a AGAL e a Real Academia Galega [2004]
- Umha proposta alternativa ao Reintegracionismo? [2003]
