PGL – A partir do mês de outubro, o tradutor Eduard del Castillo ministrará dous cursos de língua e cultura catalás em Compostela. Um deles no C. S. ‘O Pichel’, o outro, na associaçom vicinal ‘A Xuntanza’.
Segundo Del Castillo, estes cursos visam oferecer um «conhecimento global» da realidade social da língua, tratando aspetos como a extensom territorial, os diferentes graus de oficialidade segundo cada território, a situaçom sociolingüística e a cultura.
As alunas e alunos irám adquirindo as «ferramentas lingüísticas básicas» para perceber os textos escritos ou orais em catalám e desenvolverám habilidades comunicacionais para passarem da compreensom oral ao uso ativo deste idioma. O preço de ambas atividades é de 20€ ao mês.
O curso que se vai ministrar no Pichel será as quartas-feiras de 20 a 21h30 entre outubro e janeiro, com hipótese de o alargar se houver demanda. A inscriçom pode-se realizar no próprio local social (Rua Santa Clara nº 21) ou no mail gentalha[arroba]agal-gz.org.
Por sua parte, o da Xuntanza será também nas quartas-feiras, mas de 10 a 11:30, e entre outubro e junho. Será na sede da associaçom, na Corredoira das Fráguas nº 37. As inscriçons podem-se realizar em info[arroba]axuntanza.org.
Ainda, Del Castillo disponibiliza um correio eletrónico para o pessoal enviar dúvidas acerca dos conteúdos do curso: catalunya.galiza[arroba]gmail.com.
Mapa com a distribuiçom territorial da língua catalá
[prima aqui para alargar a imagem]
