PGL – Para facilitar a sua consulta, disponibilizamos a série de crónicas e áudios publicadas no blogue das I Jornadas de Cultura, Língua e Ensino da Corunha, nas quais participárom os professores Narciso de Gabriel, Bernardo Penabade, Elias Torres, Carlos Garrido, Filipe Presas, Maurício Castro e Pablo Gamallo.
Os áudios podem ser escuitados e descarregados nesta ligaçom. Oferecemos a seguir as crónicas disponibilizadas no blogue das jornadas:
Pablo Gamallo
Desde há trinta anos, a Galiza adoptou como modelo linguístico no ensino obrigatório a imersom parcial, com umha presença da língua dominada que nom ultrapassa 50% das cadeiras leccionadas. A análise rigorosa das experiências vividas noutros países e territórios mostra que este modelo nom consegue atingir os objectivos de igualdade de uso e competência para os que foi posto em prática.
Professor Maurício Castro
Por vezes, podemos pensar que a situaçom de conflito lingüístico existente na Galiza é anómala em relaçom a outros processos de substituiçom lingüística no mundo existentes, mas realmente é umha problemática comum a outros casos.
Para comprovarmos que os problemas que enfrenta a comunidade lingüística galega nom som devidos a algum mal atávico e que se reproduzem em contextos semelhantes, será útil compararmos como funcionam num outro caso em que é o espanhol que ocupa a posiçom minorizada: Porto Rico. Também veremos como, no fundamental, em ambos casos funcionam os mecanismos ideológicos de dominaçom sociolingüística.
Professor Filipe Presas
O ensino de português como umha oportunidade docente. Actualmente muitos professores de ensino secundário, por necessidades horárias, estám a leccionar português. O facto de incluir português no CV dá umha vantagem competitiva aos docentes. Existe também as secções bilingues, a maioria em inglês e em francês quando em português seriam muito mais acessíveis para docentes e alunos(as).
Professor Carlos Garrido
A partir da consideraçom e análise de umha rica mostra de usos lexicais hoje realizados por utentes cultos de galego, fai-se um levantamento dos processos de degradaçom que historicamente tenhem afectado o léxico galego e das correspondentes atitudes dos actuais codificadores.
A conclusom de tal inventário é desalentadora: para a maioria dos actuais utentes cultos de galego Nom existe nesta língua um sistema lexical funcional, estável e coerente, nem um modelo de correcçom lexical autónomo diferente do castelhano, de modo que só a ingenuidade de muitos e a impostura de alguns sustenta um estado de anomia e subsidiaridade expressivas que noutras coordenadas sociais e culturais, menos problematizadas do que as galegas, constituiria um verdadeiro escândalo.
Professor Elias Torres
As comunidades precisam de elementos culturais para funcionar sobre a base da sua coesom social. Nos seus processos e por diferentes mecanismos vam seleccionando aqueles em que se reconhecem com maior facilidade, aceitando ou resistindo propostas, imposiçons, etc., algumhas das quais acabam mesmo por ser interpretadas como inerentes (“essenciais”) à comunidade por parte de algumhas elites ou grupos.
Isto pode empecer as tomadas de decisom para a continuidade da comunidade e a sua coesom e pôr em risco o próprio objectivo que se persegue, ao perder de vista o carácter instrumental desses elementos, fixar umha hierarquia que nom se corresponde com os valores e desejos da comunidade ou apresentá-la de modo insatisfatório para um conjunto importante da mesma. Galiza está numha tessitura destas características.
Professor Bernardo Penabade
O modelo aditivo de política linguística municipal foi aprovado e aplicado por unanimidade de todas as forças políticas no Concelho de Burela desde o mês de Abril de 2008. O autor incidirá na área didáctica em tudo aquilo que tem de renovador.
Professor Narciso de Gabriel
Relatório através da qual nos aproximaremos à intensidade do projecto educativo na Galiza, prestando especial atençom à língua no devir e desenvolvimento do espírito profissional dos mestres e mestras galegos durante os séculos XIX e XX principalmente.
+ Ligaçons relacionadas:
