PGL – A A.C. Amig@s da Cultura e a Coordenadora de Trabalhadores/as de Normalizaçom da Língua (CTNL) denunciam o anúncio feito por Telmo Martín, candidato do PP à presidência da Câmara Municipal de Ponte Vedra, relativo a que suprimirá o serviço se lograr a chefia do Concelho nas vindouras autárquicas.
Para a CTNL, essa promomessa eleitoral é «um ataque à língua» e exigírom umha «imediata retificaçom pública». Da Coordenadora amossárom a sua «preocupaçom» com estas declarações, aliás contrárias «à legislaçom lingüística» e amostra da «atitude imprópria de umha pessoa que aspira a ser autarca de umha cidade galega».
Da CTNL lembrárom Martín que Estatuto de Autonomia da Galiza, além de reconhecer o galego como língua própria do país, recolhe que os poderes públicos «potenciarám o emprego do galego en todos os planos da vida pública, cultural e informativa e disporám dos meios necessários para o seu conhecimento».
Ainda, a Lei de Normalizaçom estabelece que «os poderes públicos da Galiza promoverám o uso normal da língua galega, oralmente e por escrito, nas suas relações com os cidadãos», e que «o Governo galego e as corporações locais, dentro do seu, âmbito fomentarám a normalizaçom do uso do galego nas atividades mercantis, publicitárias, culturais, associativas, desportivas e outras».
A Associaçom Cultural Amig@s da Cultura de Ponte Vedra quer somar-se às vozes que están a manifestar o seu rejeitamento às declaraçons realizadas polo líder do PP local e candidato deste partido nas vindouras eleiçons municipais, Telmo Martim, nas que prometia eliminar o Serviço de Normalizaçom Lingüística do Concelho de Ponte Vedra.
De Amig@s da Cultura, como associaçom que tem a defesa da língua como razom de ser, acham que a promessa eleitoral de Martín é «um ataque» ao galego, «na linha que vem desenvolvendo historicamente, e especialmente nos últimos tempos, o Partido Popular».
Para a associaçom, a «demagogia» sobre a austeridade «nom pode ocultar o que há de fundo nesta proposta, a atitude política do espanholismo mais recalcitrante que só olha na nossa língua nacional um obstáculo a eliminar quanto antes para alcançar a Espanha uniforme que desejam».
Por este motivo, consideram que «todo o que se faga para normalizar o nosso idioma é pouco», e a promoçom do galego em todos os âmbitos «é umha obriga das instituiçons». Portanto, igual que a CTNL, reclamárom umha «retificaçom imediata e pública» de Telmo Martín.
