Com esta nova modalidade participativa pretende-se estimular dialeticamente a nossa massa social para ter ferramentas mais maciças no debate com coletivos aparentemente mais distantes com o reintegracionismo.
Trás o sucesso da criaçom da figura do Amigo/a da AGAL destinada a “aquelas pessoas que compartilharem os princípios e objetivos da associaçom mas que nom podam satisfazer a quota por razons económicas” (artigo 7 dos Estatutos) e do Irmao/á da AGAL na sequencia da comemoraçom do centenário das Irmandades da Fala, o Conselho da AGAL acaba de aprovar uma nova maneira de pertencer ao nosso coletivo: o Cunhado/Cunhada da AGAL, que teria os mesmos direitos duma sócia exceto o voto em assembleia.
Esta figura está destinada àquelas pessoas que, a priori, manteriam uma posiçom distante a respeito do reintegracionismo, e cujo único requisito de entrada seria manterem uma relaçom sentimental com a irmá/o dalguma sócia/o da Associaçom Galega da língua, quem deverá apresentar uma declaraçom jurada de ter ouvido em encontros familiares comentários reintegracunhados do tipo:
- Isolacionista firme. Exemplo: “Por muito que insistais, galego e português som duas línguas diferentes e ponto”.
- Hispano-patriota. Exemplo: “No tenéis bastante con ser españoles como para querer ser ahora portugueses”.
- Outros que o Conselho considerar reintegracunhados.
Tal relaçom deverá-se demonstrar polos meios que determina a legislaçom vigente, isto é, certificado de convivência, livro de família ou certificado de parelha de feito.
A diferença das outras figuras existentes destinadas a pessoas que já simpatizam com o reintegracionismo, o Cunhado/a está pensado para introduzir diferentes perspetivas nos debates assembleares a fim de forçar o nosso coletivo a um perfecionamento dialético para entrar em terrenos estancos por enquanto.
Contudo, a figura do Cunhado/a deverá ser aprovada na próxima Assembleia da Associaçom Galega da Língua. E, de acordo com o espírito participativo da nossa organizaçom, podes sugerir a inclusom de novas categorias reintegracunhadas para acrescentar enviando um e-mail a presidencia[@]agal-gz.org.
