Convocados concursos literários 2016 do Facho

As bases dos diferentes certames assinalam explicitamente a nom discriminaçom por razom de normativa ortográfica



Agrupaçom Cultural 'O Facho'

Agrupaçom Cultural ‘O Facho’

A Agrupaçom Cultural O Facho convoca a ediçom 2016 dos seus certames literários. O requisito comum a todos os prémios é que as obras deverám ser redigidas em galego. Para além disso, as bases dos vários certames assinalam explicitamente a nom discriminaçom por razom de normativa ortográfica, um facto infreqüente nos concursos literários da Galiza.

O prazo de admissom de originais remata no dia 15 de abril do 2016, às doze da noite. A decisom do júri comunicará-se no mês de maio. Os originais nom premiados poderám ser retirados, no prazo de 30 dias, no local do Facho, prévio correio dirigido ao endereço postal da Agrupaçom. No caso de que o autor o autora nom resida na Corunha, poderá solicitar que lhe sejam enviados por correio postal.

Certame de Poesia

Concurso de Poesia 2016. A este certame poderá concorrer qualquer pessoa até os 35 anos de idade e sempre que nom tenha publicado nengum livro individual de poesia e a obra seja inédita e nom premiada com anterioridade. O único limite é que cada autor ou autora poderá apresentar unicamente umha obra ao certame.

Segundo O Facho, é responsabilidade do júri do prémio determinar se algum dos trabalhos apresentados possui ou nom as caraterísticas para ser considerado «livro»; porém, recomenda-se que tenham umha extensom mínima de 300 versos.

Os originais para o concurso enviarám-se por triplicado devidamente encadernados, em formato DIN-A4, a duplo espaço e mecanografados por umha só cara ao apartado dos correios 1320; ou também à Caixa de Correios n.º 46, Oficina Principal da Corunha. Apresentarám-se sob um lema, que figurará na capa dos textos enviados, e virám acompanhados de um envelope fechado que contenha no exterior o lema da obra e, no interior, o nome, apelidos e telefone do autor ou autora.

Estabelece-se como prémio único a ediçom da obra premiada.O Facho disporá do prazo de um ano para editar o livro. Decorrido esse tempo, o autor ou autora poderá dispor da obra com a única condiçom de que deverá deixar constáncia do galardom em sucessivas ediçons do livro. O Facho fará a entrega à pessoa premiada de 100 exemplares da ediçom. Contodo, o júri poderá declarar deserto o prémio do concurso e resolverá aquelas situaçons que se apresentem e que nom estejam recolhidas nestas bases, assim como as dúvidas que podam existir na sua interpretaçom.

Teatro infantil

Poderá optar ao prémio qualquer pessoa, sem restriçom, sempre que a obra seja inédita e redigida em língua galega, se -em qualquer norma ortográfica (AGAL, PADROM, RAG)- nom representadas, nem premiadas noutros certames. A obra nom poderá ultrapassar 80 fólios e será apresentada por triplicado no formato DIN-A4, a duplo espaço, mecanografados por umha só cara.

Apresentarám-se sob um lema, que figurará na capa dos textos enviados, e virám acompanhados de um envelope fechado que contenha no exterior o lema da obra e, no interior, o nome, apelidos e telefone do autor ou autora; e endereçarám-se à caixa dos correios n.º 46, Oficina Principal da Corunha.

Contos de miúdos para miúdos

Poderám participar nenos e nenas de 6-12 anos (categoria A) e de 13 a 16 (categoria B). Existe a possibilidade de participaçom individual ou bem através do estabelecimento do ensino; neste último caso haverá que fazer umha pré-seleçom de um máximo de dous trabalhos por categoria. AS obras devem ser relatos originais, nunca antes publicados nem premiados, e em condiçons para os direitos de publicaçom serem cedidos ao Facho por um período de cinco anos.

A extensom das obras será de um máximo de cinco fólios para a primeira categoria e dez para a segunda. As obras haverám de ser apresentar por triplicado, manuscritas ou mecanográficas, encadernadas ou grampadas e, no último fólio, os seguintes dados: nome e apelidos, endereço e telefone, correio eletrónico, estabelecimento do ensino e categoria. O envio de obras para o certame fará-se por correio postal dirigido à Associaçom Cultural e à caixa dos correios n.º 46, Oficina Principal da Corunha.

Para cada categoria haverá um primeiro e um segundo prémio. O primeiro será de 200 € em efetivo e umha biblioteca de livros doados por várias editoras; o segundo, 100 € e também umha biblioteca.


PUBLICIDADE