PGL – A organizaçom juvenil Galiza Nova convocou para hoje às 10h umha concentraçom «Pola liberdade de expressom e o direito a falarmos em galego». O ato reivindicativo terá lugar diante do julgado de primeira instáncia nº 14 de Vigo (Rua de Lalim nº 4).
A convocatória quadra com o ato de conciliaçom que decorrerá nas instalaçons judiciais e no qual participarám representantes de Galiza Nova, bem como a representaçom legal de Galicia Bilingüe (GB), pois a própria Lago rejeitou participar presencialmente por nom querer
O coletivo galegófobo denunciou há vários meses a organizaçom juvenil do BNG por umhas publicaçons de carácter informativo que recolhiam depoimentos de alunos e professores do instituto no qual Gloria Lago, presidenta de GB, dá aulas de inglês.
As declaraçons de alunos e colegas de trabalho nom deixárom em bom lugar a presidenta da organizaçom galegófoba, que decidiu denunciar —através da organizaçom que preside— Galiza Nova.
Para o coletivo juvenil, a resposta de Gloria Lago é prova da «obsessom» desta pessoa «contra o galego», e estaria inserida numha «campanha de criminalizaçom» contra Galiza Nova e outros coletivos «coerentes e conseqüentes» na defesa do nosso idioma.
Duplo processo
Este ato de conciliaçom é paralelo a um outro que já tivo lugar em 2009 polos mesmos factos e que ainda nom foi resolvido. De Galiza Nova lamentam que ainda hoje nom recebêrom a ata de aquele ato porque o solicitárom ter em galego, mas Galicia Bilingüe sim o tem na sua posse por ter aceite a versom em castelhano.
