Considerável presença da AGAL noutro dia carvalhano



carvalho-calero-video-maragotoApesar das circunstâncias, o reintegracionismo, nomeadamente a AGAL, voltou a ter grande presença por ocasiom do aniversário do nascimento de Ricardo Carvalho Calero, a 30 de outubro. As atividades organizadas à volta desta data tivérom um eco considerável em meios de comunicaçom de grande tiragem, como La Voz de Galicia e a Rádio Galega.

Musicando Carvalho Calero

O concurso musical reeditado pola AGAL, em colaboraçom com a Rádio Galega, tivo obviamente muita presença neste meio de comunicaçom, como umha conversa com Miguel Penas no momento de dar a conhecer a banda ganhadora, mas também o jornal La Voz de Galicia recolheu informaçom sobre o certame no dia do falho e noutros. Até o último dia, 80 bandas disputárom o prémio de 1500 euros e promoçom radiofónica que finalmente levárom os Clássicos Livres em apertada competiçom com a Banda da Loba e Dandy Fever.

Através Editora

A editora Através estivo mais um ano no espaço Selic organizado polo Concelho de Compostela onde prestou especial importância às obras de Carvalho Calero ou relacionadas com o escritor ferrolano. Num dos espaços da Selic foi apresentada a banda desenhada Ricardo Carvalho Calero. Coraçom de Terra e os autores e autora da Através Carlos Quiroga, Elias Torres e Helena Miguélez debatêrom sobre Carvalho Calero com Henrique Monteagudo. Em La Voz de Galicia e El Correo Gallego fôrom várias as referências ao trabalho desta editora.

Leitura Continuada

Mais umha vez, a homenagem que a AGAL, em colaboraçom com todas as instituições, partidos e famílias galeguistas do país, tinha programada para realizar no dia 30 de outubro, tivo que ser adiada. O momento preciso em que se decidia o adiamento foi retransmitido pola Rádio Galega, concretamente no seu programa Diario Cultural, que também emitiu trechos lidos do Scórpio.

Palestras e entrevistas

Sobre o reintegracionismo carvalhano houvo oportunidade de refletir em diferentes peças jornalísticas, como esta entrevista-debate em que participam Henrique Monteagudo, Marilar Aleixandre e Eduardo Maragoto. Em La Voz de Galicia o debate apareceu recolhido aqui e noutras notícias que faziam referência ao simpósio da RAG sobre a obra carvalhana em que participárom Martinho Montero Santalha e Eduardo Maragoto, ao debate da língua, à Banda Desenhada Coraçom de Terra, ao Scórpio e ao Musicando. A surpresa por tanta notícia agálica num só dia aparecia assim recolhida polo jornalista Gerardo Uz no seu muro do facebook. O presidente da AGAL também participou numha conferência sobre Carvalho “Da sua Gramática ao seu reintegracionismo” na EOI da Corunha e o sócio Denis Fernández refletiu sobre reintegracionismo numha longa entrevista para Gamer Galicia Radio.


PUBLICIDADE