PGL – A vereadora de Cultura da Corunha, Ana Fernández (PP), criticou em entrevista para El Ideal Gallego que o governo municipal anterior —coalizom PSOE e BNG— programou «cousas demasiado galegas».
Na alargada conversa também se pronunciou sobre outras questons, como o custo dos festejos ou o apoio às touradas.
Segundo Fernández, para os festejos deste ano contárom com pouco tempo e procurárom dirigir-se «a todo tipo de público». Assim, formárom parte da programaçom o Noroeste Pop Rock 2011, um concerto do espanhol Sergio Dalma, a Feira Taurina e as Casas Regionais, que som um «clássico dentro das nossas festas», indicou. Quanto às touradas, Fernández assegura que «a Concelharia nom é contra a Feira Taurina, porque tem muita gente que gosta dela, que a segue e que tem direito a vê-la».
Críticas à programaçom «demasiado galega»
Apesar de levar pouco tempo no posto, Fernández afirma que o que pior está a levar som «os titulares dos jornais». A vereadora assegura que gostaria que «se fomentasse mais o encontro do que o desencontro, a concordáncia do que a provocaçom. Gostaria de que os titulares fossem para construir». Porém, pouco depois cai, justamente, na provocaçom, ao criticar que «até o de agora estivérom-se a programar cousas demasiado galegas», o qual lembra ao conselheiro de Cultura, Roberto Varela, afirmando ao pouco de tomar posse do posto que «a cultura galega limita». Ainda, justo a seguir deixa umha frase sujeita a duplas leituras, cuja interpretaçom real nom fica aclarada polo contexto: «O importante é que para que che interesse a cultura tens de a entender, e tem de estar num idioma que entendas».
+ Ligaçons relacionadas:
