Carvalho Calero será o próximo homenageado no Dia das Letras, o qual é um motivo de imensa alegria para a nossa associaçom, com que tivo um forte vínculo.
Entendemos que para Real Academia Galega foi umha decisom difícil, pois Carvalho aglutinou ao seu redor o movimento que iria defender a visom integradora do galego na Lusofonia, oposta à da RAG. Mas o tempo passa e as posições mudam, e hoje estám a acontecer cousas que há pouquíssimos anos eram difíceis de imaginar.
Basta ver que a maioria dos meios e opinadoras que escrevem sobre o assunto nom só estám a respeitar a decisom de Carvalho (de escrever o seu apelido com v e lh) senom que também estám a opinar abertamente sobre o seu ideário lusista. Pensamos que a RAG também deveria acompanhar esta dinâmica.
Todos temos as nossas posições e temos a certeza que todas podem ser de grande ajuda à normalizaçom do nosso galego se colaborarem. A melhor maneira de começar é, sem dúvida, prestar-nos atençom.
A nossa associaçom nom vai aforrar esforços nem recursos para divulgar a figura e a obra de D. Ricardo: o moço ferrolano que chegou a Compostela e aderiu a causa galeguista e republicana, o represaliado polo franquismo, o literato, o estudioso da literatura e, também, o grande referente do reintegracionismo. Com este fim, vai-se realizar um documentário sobre a sua figura, um site com recursos multimedia e a publicaçom de vários livros, que incluem a reediçom da sua novela Scórpio, uma antologia poética, uma história em banda desenhada e outros que iremos anunciando durante o ano Carvalho.
Nom queremos concluir este comunicado sem dar os parabéns à RAG pola sua decisom, à família de D. Ricardo e a todas as pessoas que percebem o seu legado como algo próprio.
