O Projeto Pontos é umha iniciativa impulsada pola Comissom de Língua da associaçom A Gentalha do Pichel para a promoçom da língua galega e do consumo responsável entre os estabelecimentos comerciais de Compostela.
Na sexta-feira passada, dia 18, foi organizada no Pichel umha festa para celebrar o sucesso da iniciativa. As pessoas que até ali se achegárom pudérom ver umha exposiçom de fotos dos 50 locais participantes e conhecer também a apresentaçom da campanha de descontos de Natal e do calendário 2016, entre outras propostas.
Do PGL falamos com os responsáveis do projeto para conhecer mais a respeito.
De que maneira surgiu a ideia de criar este projeto? Quais fôrom os objetivos que vos propugestes desde o início?
Pensamos em identificar os estabelecimentos que tenhem um compromisso com a nossa língua e fam o possível por normalizar o seu uso com o objetivo de reconhecer o seu labor. É como dar-lhes um prémio simbólico e animar o pessoal comprometido com a língua a fazer um consumo lingüisticamente responsável.
Seria interessante chegar a criar umha rede de locais comprometidos com a nossa língua.
Em que consiste o Projeto Pontos? Como se desenvolve a avaliaçom dos comércios e de que maneira se aplicam as pontuações e a mençom especial NH?
Normalmente encontramos os comércios por sermos clientes, ao passarmos por diante, por referências doutras pessoas ou inclussive podem ser eles próprios os que contactam connosco. Despois fazemos umha visita, contamos em que consiste o projeto e perguntamos polos seus usos lingüísticos. Dependendo do seu grau de implicaçom, damos 1, 2 ou 3 pontos. Se assumem o caráter internacional da nossa língua, concedemos ainda a mençom especial NH.
Os critérios dos pontos som: atendimento na íntegra em galego; percentagem relevante de imprensa, publicaçons ou música em galego; administraçom interna em galego; comunicaçom externa em galego e compromisso ativo com a normalizaçom lingüística
O programa já leva mais de dous anos em andamento e polo sucesso que está a ter parece que vai continuar muito tempo mais. Quantos estabelecimentos participam na atualidade desta iniciativa? Que tipo de negócios som?
Apesar de terem fechado bastantes negócios que estavam no projeto, agora andamos polos 50. Na sexta-feira 18 de dezembro celebrámos umha festa no nosso centrol social com umha exposiçom de fotos dos 50 locais, a apresentaçom da campanha de descontos de Natal e do calendário 2016 e umha mesa redonda com membros dalguns dos negócios.
Temos bares e restaurantes, cabeleirarias, lojas de roupa, alimentaçom, informática, escolas e academias, livrarias e lojas de discos, assessorias, advogadas, oficinas de reparaçom de carros, clínicas veterinárias, fotocopiadoras, imprensas…ç
Do ponto de vista dos comércios participantes e da vizinhança de Compostela, como pensais que está a ser acolhido o programa?
Está a ser mui bem acolhido tanto polos participantes como polas pessoas comprometidas com a língua. É um reconhecimento e umha ferramenta útil para o consumo lingüístico responsável.
Umha das iniciativas promovidas polo projeto é a campanha Pontos de Desconto, ativa até o dia 6 de janeiro de 2016. Em que consiste?
Consiste basicamente em beneficiar a comunidade de consumidoras que aplicam o critério lingüístico na hora de fazerem as compras. Com um folheto distribuído pola cidade e que tem que estar carimbado pola Gentalha do Pichel, as pessoas poderám beneficiar de descontos e presentes em 17 lojas de diverso tipo: vinhos, roupa, livros, chás, carnes, peixes… É umha forma de criar e coesionar um grupo de gente crescente que quer consumir responsavelmente, também em relaçom à língua.
+ Ligaçons relacionadas:
