PGL – Perpinhám, cidade francesa situada em território histórico da Catalunha, vem de aprovar a oficializaçom da língua catalá. O facto constitui o início de um processo polo qual o idioma poderia recuperar a consideraçom por parte dos 25 municípios da Mancomunitat de Perpinyà.
Os objectivos da Carta Municipal da língua catalá som, além de situar a língua catalá ao mesmo nível do que o francês, garantir a sobrevivência e a transmissom generacional, asim como assegurar a presença na vida pública e social da cidade.
O documento aprovado pola Câmara Municipal ampara-se em diversos textos internacionais, mas também na própria Constituiçom francesa. Segundo o regedor municipal, Jean-Marc Pujol, o texto «pretende explicar ao conjunto da populaçom que tenhem umha identidade catalá, da qual estamos orgulhosos e que queremos promover».
A Carta aclara que as medidas para favorecer o desenvolvimento do catalám como língua oficial estenderám-se aos âmbitos do ensino, o serviço à infância, a sinalética, os serviços públicos e uso social e os meios de comunicaçom. Por outra parte, insta expressamente as «administraçons, regedores, entidades, empresas associadas e estruturas supramunicipais a integrar a dimensom da língua catalá nas suas funçons e atribuiçons, especialmente em todo o que concerne à comunicaçom com o público».
+ Ligaçons relacionadas:
- O catalám já é língua cooficial em Perpinhám [Racó català, 11/06/2010]
