PGL – O professor Carlos Garrido apresenta hoje na Faculdade de Filologia Corunha o seu último trabalho, Léxico Galego: Degradaçom e Regeneraçom, noticiado recentemente polo Portal. O ato está organizado pola área de Filologia Galega e Portuguesa da Universidade e iniciará polas 12h30.
Nesta apresentaçom participarám o próprio autor, Carlos Garrido, quem falará sobre as estratégias de regeneraçom do léxico galego analisadas na monografia, bem como o professor Xosé Ramón Freixeiro Mato, do Departamento de Galego-Português da UdC, que efetuará a correspondente apresentaçom.
Léxico Galego: Degradaçom e Regeneraçom é o estudo mais profundo publicado até à data sobre léxico galego. Esta monografia indica umha estratégia para conseguir a plena regeneraçom do léxico galego e lança os alicerces de umha codificaçom lexical eficaz. Baseia-se num modelo teórico que compreende a atuaçom de diversos fatores de degradaçom lexical (classificados em processos degradativos e em atitudes nom regeneradoras), os quais, incidindo sobre o sistema lexical galego desde o século XV até à atualidade, tenhem determinado, tanto no léxico popular como no culto, um estado de descaracterizaçom e de disfuncionalidade que hoje compromete a capacidade expressiva da língua.
O professor Carlos Garrido, presidente da Comissom Lingüística da AGAL, realiza umha diagnose, de grande profundidade analítica, das deficiências que na atualidade padece o léxico da fala espontánea, o léxico dos utentes cultos de galego e o léxico padronizado polos codificadores, o que, por sua vez, se revela instrumental para delinear umha estratégia encaminhada à plena regeneraçom lexical, a qual, o livro mostra e demonstra de modo eloqüente, nom pode senom basear-se numha decidida coordenaçom lingüística galego-portuguesa.
+ Ligaçons relacionadas:
