PGL – Umha questom económica acabou com o serviço de normalizaçom lingüística da Câmara Municipal de Vimianço. Segundo o próprio autarca, Alejandro Rodríguez (PSOE), a supressom da actividade normalizadora e o despedimento do técnico que a realizava deve-se ao dinheiro, e mesmo rejeitou umha subvençom de 36 mil euros para o triénio 2009-2011 alegando que «nom cobre todos os gastos».
Da Coordinadora de Técnicos de Normalizaçom Lingüística (CTNL) rejeitam os pretextos da Câmara de Vimianço, e lembram ao regedor que «nenhuma subvençom pode cobrir a totalidade dos custos do projecto subvencionado».
Ante esta situaçom, a CTNL já se dirigiu ao autarca para solicitar que a Câmara reconsidere a sua decisom e continue o serviço de normalizaçom, que deve estar dotado de «pessoal técnico estável». Para isso, indicam, Vimianço deveria destinar «o dinheiro necessário».
Ainda, a CTNL denunciará a situaçom a todos os grupos políticos com representaçom no município, além de informar a Deputaçom da Corunha (da qual procede a subvençom), à Direcçom Geral de Administraçom Local e à Secretaria Geral de Política Lingüística, entidades as três também chefiadas por responsáveis do PSOE.
Algumha das actividades do gabinete de normalizaçom de Vimianço podem ser ainda consultadas na internet.
