PGL – Através do concurso ‘O Burato do Inferno’, destinado à recuperaçom da toponímia, 200 nomes da costa e do mar de Bueu fôrom recuperados. As pessoas que participárom no certame tivérom ajuda de um guia[PDF] publicado polo projeto Bueu Informa, no qual se dérom indicações para localizar e compilar os nomes.
No entanto, ainda nom se conhece o nome da pessoa ganhadora, para o qual será tido em conta a explicaçom da origem de cada topónimo e mais a clareza da sua localizaçom, informa Culturagalega.org.
Confraria de Pescadores
‘O Burato do Inferno’ é umha iniciativa da Confraria de Pescadores Sam Martinho. Segundo se explica nas bases, “a toponímia de umha regiom pesqueira é parte muito importante do património cultural da mesma”, pois é “representaçom do conhecimento marinheiro tradicional” e “fai parte da identidade de umha zona, que conhece a situaçom de determinados pontos polos nomes tradicionais, desconhecidos para o resto da sociedade”.
As pessoas participantes tivérom ajuda de um guia editado para a ocasiom
Com o passo das gerações, e em especial com a perda de populaçom dedicada ao mar, “produz-se umha perda desta parte do património cultural marinheiro”, um conhecimento “de grande interesse para usos posteriores em áreas como a gestom de recursos, turismo, cultura marinheira, etc.”.
As pessoas que participárom no certame, obrigatoriamente gente vinculada ao mar, tivérom de indicar num mapa os nomes tradicionais de praias, esteiros, cantis, ilhas e ilhéus, portos, cons e outros acidentes geográficos. Além dos nomes, pediu-se-lhes também incidar, se possível, a procedência ou origem do mesmo.
+ Ligações relacionadas:
