Em pouco mais de um mês conseguiu umha boa receçom a inciativa da AGAL de compartilhar dicas lingüísticas através das redes sociais. Primeiro foi, em finais do passado dezembro, o lançamento do perfil no Twitter @emgalego, concibido já do primeiro momento como umha versom mais flexível do Consultório da Comissom Lingüística da associaçom. Duas semanas depois, foi anunciada a criaçom de umha lista de reproduçom para @emgalego no canal de Youtube da Através Produtora, marca audiovisual da AGAL.
@emgalego no Twitter
Graças à flexibilidade e rapidez —mas também obriga de síntese— que possibilita o Twitter, @emgalego divulga várias vezes por dia recomendações lingüísticas do mais diverso teor. Dicas que, na maior parte dos casos, serám de interesse para a maior parte das pessoas galego-falantes, nom apenas as reintegracionistas.
Na Galiza nom se di ‘fai um ano’. Di-se ‘há um ano’, com o verbo haver.
— em galego (@emgalego) 10 fevereiro 2016
Lembra que as estaçons tenhem artigo: estamos no inverno.
— em galego (@emgalego) 8 fevereiro 2016
Mas a conta também interage como público e funciona, como se indicou, de maneira complementar ao Consultório.
@anordestado entre Ogrove e Ponte Vedra podemos passar por Sam Genjo, Porto Novo ou Combarro.
— em galego (@emgalego) 4 fevereiro 2016
@emgalego Fantástico! O uso da maiúscula sempre me pareceu cópia desnecessária do Inglês.
— Wika GZ (@GzWika) 9 fevereiro 2016
Na hora de redigirmos estas linhas, @emgalego publicou quase trescentas mensagens e alcançou perto de 500 seguidores e seguidoras.
@emgalego no Youtube
No Youtube som as próprias pessoas as que publicam um vídeo com o intuito de compartilharem com a comunidade galego-falante as suas próprias dicas para um melhor uso da língua. Há exemplos, por enquanto, de restauraçom de palavras galegas que no dia-a-dia estám a ser substituídas por formas castelhanas ou, também, conselhos para eliminar castelhanismos desnecessários.
A conta no Youtube ultrapassou já as cem pessoas assinantes. Da equipa encorajam os interessados e interessadas a encaminharem as suas vídeo-dicas ao endereço eletrónico secretaria@agal-gz.org.
