PGL – A bienal de Vila Nova de Cerveira atinge XVI ediçom alargando a exposiçom ao Porto e a Vigo. O evento inclui umha ampla variedade de expressons artísticas das últimas tendências contemporâneas que se desenvolve desde o passado 16 de julho até 17 de setembro.
Os espaços em que se desenvolverám as distintas exposiçons e expressons artísticas som o Fórum Cultural, a Biblioteca Municipal (Solar de Castros), o Convento de São Paio, o Castelo, o Palacete Viscondes de Balsemão (Porto) e a Casa das Artes (Vigo). Esta última acolhe a exposiçom “Arqueologia do Detalhe”, de Fátima Lambert, dentro da Linha Curatorial que abrange o âmbito da investigaçom.
O programa integra também o Concurso Internacional e artistas convidados, além de residências artísticas, performances, workshops, ateliês infantis, visitas guiadas, conferências, debates e concertos. O começo da vertente musical correspondeu aos grupos OrqueStrada e Samuel Úria.
A bienal de 2011 quer fomentar a modernizaçom e internacionalizaçom deste foro cultural e artístico e promover a interaçom entre público, artistas e oradores. Cumpre salientar que nesta nova ediçom foi criada a Fundação Bienal de Cerveira, instituiçom organizadora e que tem entre as suas prioridades o reforço das ligaçons culturais entre a Galiza e o Norte de Portugal.
Ao abeiro deste Programa de cooperaçom transfronteiriça entre estes dous países e específicamente através do projeto Espaço Juvenil, podem participar em tarefas de voluntariado moças e moços galegos, sempre que a sua idade se encontre compreendida entre 18 e 30 anos. As funçons a realizar som apoio à organizaçom na vigilância dos diferentes espaços e exposiçons, informaçom aos visitantes e acompanhamentos de visitas guiadas. Os turnos serám de quinze dias (duraçom mínima exigida, sete dias), nas seguintes datas:
1. De 15 a 31 de julho( 5 voluntárias ou voluntários)
2. De 1 a 15 de agosto( 5 voluntárias ou voluntários)
3. De 16 a 31 de agosto( 5 voluntárias ou voluntários)
4. Do 1 a 17 de setembro(5 voluntárias ou voluntários)
As pessoas interessadas em colaborar devem preencher a ficha de inscriçom e reencaminhá-la para o endereço voluntariado[arroba]xunta.es.
