PGL – A Sociedade Cultural e Desportiva (SCD) do Condado organiza, este sábado, um concerto que tem por objectivo recaudar fundos para o vindeiro Festival da Poesia. O concerto, protagonizado por Ataque Escampe e Fortuítos, vai estar precedido por um passaruas que, desde as oito da tarde, percorrerá diferentes bares de Salvaterra de Minho na companha do Son da Triga.
A engranagem da XXVII ediçom do Festival da Poesia no Condado está em marcha. Com o objectivo de recaudar dinheiro para apoiar a sua organizaçom, a SCD organiza umha festa, este sábado, na Casa da Cultura (Rua Rainha Dona Urraca, s/n) de Salvaterra. Desde as 22:00 hh. vam actuar os Fortuítos, umha banda de recente criaçom composta por membros da esceia musical do Condado. Ao rematarem, será a quenda de Ataque Escampe e o seu “rock de serie b”, apresentando o seu último trabalho Noites de agosto con Ataque Escampe.
Sem embargo, nim a festa nim a música se limitam ao concerto: começam antes, às oito da tarde, com um passaruas guiado polo grupo de música tradicional o Son da Triga. Hai várias paradas programadas para a tarde: o bar Grandal, o Katro Ruas, o Milenium, a Taberna Os Fenteiros e o Vagalume Café-Concerto.
A entrada é de balde e durante a festa vam-se sortear entradas para concertos no Bar Liceum e outras surpresas.
A SCD do Condado agradece a difusom desta informaçom, com a que se apoiam e difundem as manifestaçons da cultura popular e de base.
