Xabier Lago Mestre – O colectivo cultural Fala Ceive do Berço dirige-se à Real Academia Galega para fazer a proposta formal de Antonio Fernández y Morales como escritor a quem dedicar o próximo Dia das Letras do ano 2011.
O dito autor, Antonio Fernández y Morales (Astorga, 1817 –Cacabelos, 1896), destacou polo livro titulado Ensayos poéticos en dialecto berciano. Esta obra em galego publicou-se no ano 1861, dous antes dos Cantares Gallegos de Rosalia de Castro, polo que forma parte da corrente literária chamada Ressurgimento Galego. Em 2011 cumpriram-se 150 anos da ediçom do livro, polo que cremos que é a melhor oportunidade para homenagear este escritor galego-berciano.
Contudo, este escritor berciano é um desconhecido para a meirande parte dos galego-falantes do Noroeste peninsular. A sua escassa obra em idioma galego nom deve empecer um maior reconhecimento social. No século XIX esta língua no Berço quase que nom tinha representaçom escrita. Antonio Fernández y Morales soubo recompilar parte dessa literatura oral de diversa temática (magusto, vindima, Entrudo, sega, feira, fiandom…), para conservá-la e dignificá-la através da sua escrita.
Agora esses Ensayos poéticos en dialecto berciano som fonte essencial para os estudos filológicos do idioma galego do XIX, etnográficos e históricos. Os defensores do galego na regiom do Berço temos de estar mui agradecidos polo seu trabalho lingüístico a prol deste idioma minorizado. A sua valente e ousada intervençom cultural é todo um exemplo para as comunidades galego-falantes periféricas, e nom pode ser silenciada por mais tempo. Por isso o Dia das Letras Galegas, dedicado a Antonio Fernández y Morales, seria a melhor das homenagens colectivas que se lhe podam fazer em 2011.
A Real Academia Galega nom deve valorizar nesta ocasiom unicamente a quantidade e a qualidade literária da obra do candidato proposto, mas o seu valor sociocultural num espaço periférico assovalhado lingüisticamente. A possível eleiçom deste autor teria também um forte simbolismo, para a toma de consciência, para as comunidades territoriais galego-falantes periféricas, a saber, Návia-Eu, Berço, Portelas e Vale do Elhas.
A reivindicaçom secular destes quatro territórios nom pode ser esquecida, todo o contrário. Por isso, cada certo tempo convém reclamar que o Dia das Letras Galegas recaia num representante destas zonas. Está claro que nesta eleiçom anual os galego-falantes periféricos nom podemos concorrer em igualdade de condiçons com os propostos pola Galiza administrativa. Para salvar esta desigualdade, cumpre também neste tema contar com um certo grau de discriminaçom positiva a prol dos candidatos da Galiza periférica.
Na possível eleiçom do candidato Antonio Fernández y Morales nom se pode passar por alto o contexto sociolingüístico de hoje. Referimo-nos a que os bercianos galego-falantes estamos vindicando o reconhecimento do idioma galego na vindoura reforma da Lei autonómica da Comarca do Berço. Trata-se de conseguir que o galego tenha já um uso institucional parcial no seio das administraçons locais a pesar da carência de oficialidade deste idioma. Galiza deve molhar-se neste tema sobranceiro, porque está em jogo o futuro da língua galega periférica. A declaraçom do Dia das Letras Galegas do 2011 para o nosso Antonio Fernández y Morales seria um apoio explícito e mediático à vindicaçom da comunidade galego-falante do Berço. Que todo este pulo colectivo sirva para que ao final todos e todas podamos dizer isso de «os tempos som chegados dos bardos das idades, que as vossas vaguidades cumprido fim terám (…)».
