CTNL (*) – A Coordenadora de Equipas de Normalizaçom Lingüística (CTNL) de Ferrol e a Câmara municipal pugérom em andamento um sítio web para a informaçom e reflexom sobre a vida e a obra do intelectual ferrolano Ricardo Carvalho Calero.
A Câmara municipal de Ferrol comemorou o passado ano 2010 o centenário do nascimento de um dos seus filhos mais ilustres, dom Ricardo Carvalho Calero. Fôrom várias as atividades realizadas com o fim de lembrar e pôr em valor com dignidade a sua figura: atividades culturais, jornadas literárias, teatro… pouco depois a materializaçom da compra da sua casa no bairro de Ferrol Velho, para a sua posterior recuperaçom, e a proposta da declaraçom do Dia das Letras Galegas 2012 para Ricardo Carvalho Calero.
Segundo manifestam da Câmara municipal, «o conhecimento e o entusiasmo pola obra de Carvalho Calero deve seguir viva e nom deixar esmorecer o entusiasmo posto na celebraçom do centenário, e assim nasceu esta página, com o objetivo de que, passado o centenário, haja um espaço dinâmico e aberto para o mundo do ensino em que as possibilidades de se achegar à figura de Carvalho Calero, de trabalhar com a sua obra, de interpretá-la e conhecê-la, se mantenha de forma permanente».
Esta ideia surgiu do dinamismo da Coordenadora de Equipas de Normalizaçom Lingüística de Ferrol e do próprio Departamento de Normalizaçom da Câmara municipal e concretiza nesta página desenhada pola empresa Tagen Ata.
Segundo assinalam, «oferecemos esta página como um campo de trabalho aberto para a comunidade educativa que nos permita todos conhecer e valorar o nosso autor como corresponde. O professorado e o estudantado poderám achegar recursos e as suas atividades à página durante o curso, com o fim último de que a fagam sua e a utilizem como um recurso educativo próprio».
A Câmara municipal, através do departamento de Normalizaçom Lingüística, oferecerá nestes meses, como complemento da atividade, obradoiros formativos para a utilizaçom do gestor de conteúdos para o espaço web.
(*) Texto adaptado do site da CNTL
