PGL – A Fundaçom Artábria reeditou em formato digital o livro Conhecermos Carvalho Calero, umha vida polo galego e a Galiza. A obra foi publicada originariamente em 2000, com motivo dos dez anos do óbito do professor e escritor ferrolano, para realizar umha aproximaçom a esta figura ‘oculta’ da cultura galega.
Neste trabalho, o Grupo de Língua da Fundaçom Artábria realiza um percurso pola vida de Ricardo Carvalho Calero e por alguns «fragmentos significativos» da sua produçom sociolingüística. O objectivo, apresentar umha das faces deste personagem imprescindível para a cultura galega que tem sido mais vezes submetida «ao ocultamento oficial já em vida», e mesmo reclamálo para «um lugar de destaque num Ensino Nacional Galego».
Umha outra motivaçom para o colectivo foi o de popularizar entre a mocidade a figura deste autor, «rompendo o silenciamento e reivindicando o profundo patriotismo que caracteriza o seu insubornável percurso vital», quer na II República espanhola, quer na ditadura ou já nos tempos posteriores ao regime franquista. «Em todo o momento, Carvalho demonstrou o seu compromisso com os direitos dolectivos do povo galego», assinalam da Fundaçom no prefácio desta obra.
Capa do livro reeditado pola Fundaçom Artábria
Conhecermos Carvalho Calero. Umha vida polo galego e a Galiza [Issuu]
Descarregar em PDF [4.5 MB]
Campanha Letras Galegas 2010
A Fundaçom Artábria leva vários anos a trabalhar por lograr que seja dedicado um Dia das Letras ao insigne intelectual e galeguista. Apesar dos numerosos apoios logrados para intentar que 2009 fosse o ano marcado, afinal a Real Academia Galega optou por Ramón Piñeiro. Porém, de Artábria nom dessistem e têm como novo objectivo 2010, ano do centenário do nascimento de Ricardo Carvalho Calero, e ano no qual se cumprirám também vinte anos do seu passamento.
Disponibilizada conferência de 1979
A Fundación Juan March disponibiliza na rede a conferência Castelao, ministrada polo professor Ricardo Carvalho Calero em 25 de Outubro de 1979 na seqüência do ciclo Cuatro escritores gallegos. O áudio pode ser assistido e descarregado no web da instituiçom.
+ Ligações relacionadas:
