Esta tarde, às 18:15 fara-se a apresentaçom virtual de “Ricardo Carvalho Calero. Coraçom de terra” nesta ligaçom. Falarám Valentim Fagim em nome de Através Editora, e Xico Paradelo e Irene Veiga, como roteiristas da banda desenhada que acaba de sair do prelo com grande suceso graças ao apoio maziço à campanha de micromecenado.
A obra que está a chegar às livrarias e às casas das mais de 300 pessoas que participarom no crowfunding, foi apresentada na passada sexta-feira no primeiro ato público em Vilar de Santos, na Arca da Noe. Neste evento participarom Xico Paradelo, Irene Veiga e Carlos Rafael, roteiristas da obra, para além dos investigadores José Manuel Barbosa e Isaac Alonso Estraviz.
Estes dias, 26, 27 e 28 de junho está a se celebrar o I Festival Virtual da Literatura galega, segundo a organizaçom, um espaço virutal com o objetivo de vissibilizar a riqueza cultural galega e a riqueza empresarial que tem detrás através de múltiplas atividades. Foi a crise sanitária da COVID-19 e o confinamento social o motivo que promoveu que os setores da indústria cultural apostassem por um evento destas características.
A programaçom completa pode ver-se aqui.
“Ricardo Carvalho Calero: Coraçom de Terra” é umha biografia ficcionalizada sobre o autor homenageado no Dia das Letras Galegas. Na mesma aborda-se a vida e a obra do autor a partir dos seus próprios textos e lembranças e propom-se, a partir deste percurso, revisar a história da cultura galega ao longo do século XX.
A obra arranca em Lisboa, 1996, numha realidade alternativa. Durante o ato de fundaçom da COMUNIDADE DOS PAÍSES DE LÍNGUA PORTUGUESA, Ricardo Carvalho Calero, representante da Galiza e um dos principais intelectuais do galeguismo, imagina, momentos antes de tomar a palavra, como teria sido a sua história e a da sua Terra se o passado tivesse acontecido de umha forma diferente.
Xico Paradelo, veterano membro dos coletivos de BD Frente Comixario e BD Banda, assina os textos desta obra, que conta com o trabalho de Iván Suárez na parte gráfica. Suárez é conhecido como autor de três obras de banda desenhada sobre a figura de Castelao com roteiro de Inacio Vilariño. A obra conta também com o trabalho de Irene Veiga e Carlos Rafael Ramos nos roteiros.
O livro de 124 páginas em formato A4 vertical a preto e branco, encadernado em capa dura, está editado em parceria pola Através Editora e a Demo Editorial. A ediçom conta ademais com o apoio da Xunta de Galicia, a Asociación Cultural BD Banda, as livrarias Paz e Kómic, A Mesa pola Normalización Lingüística e os concelhos de Ferrol, Lugo, Santiago de Compostela, Carvalho e Ponte Vedra.
