PGL – O presidente da AGAL, Valentim R. Fagim, estará a 24 de novembro, quarta-feira, na Faculdade de Filologia na Corunha. Ali falará acerca da estratégia luso-brasileira para a nossa língua (igual que acabou de fazer no IES A Sangrinha), e para apresentar o manual Do Ñ para o NH, que recentemente atingiu a segunda ediçom.
A palestra, que iniciará a 12h30 no Salom de Graus, vai ser apresentada pola professora Cilha Lourenço Módia. A maior parte do público prevê-se que seja alunado do primeiro grau de galego-português, espanhol, e inglês e estudos lingüístico-literários. A intervençom do presidente da AGAL e membro da sua Comissom Lingüística estará ligada com as deu anteriormente noutras localidades do país, umha das mais recentes a já referida da Guarda. Como sempre, o didactismo, e o bom humor serám marca da casa.
A seguir, polas 13h30, Fagim apresentará a segunda ediçom de Do Ñ para o NH, subtitulado Manual de língua para transitar do galego-castelhano para o galego-português. Neste trabalho parte do facto de os galegos e as galegas falarem já português, mas num formato muito castelhanizado. Portanto, as diferentes unidades batem o ponto naqueles aspetos onde esta interferência é mais evidente. Configura-se, aliás, como umha «boa ferramenta para pessoas que querem falar um bom galego, usem a ortografia que usarem», explica.
+ Ligaçons relacionadas:
- A estratégia luso-brasileira no IES da Sangrinha [PGL, 23/11/2010]
- Palestra sobre a Lusofonia no IFP da Farixa [PGL, 03/05/2010]
- As Estratégias para a Língua, por Valentim R. Fagim [PGL, 18/01/2010]
