PGL – Quinta-feira dia 24, às 19h30, continuam as apresentaçons das Cartas do cárcere, escritas por Antonio Gramsci e publicadas por Estaleiro Editora. Desta volta será no Centro Social A Revira (Gonzalo Gallas, 4, res-do-chao, Ponte Vedra). No ato intervirám Vítor Suárez, da casa editorial, e Carlos Diegues, tradutor do livro e co-autor do prefácio.
Para além de explicar o significado da obra na trajetória gramsciana e de dar conta das circunstáncias que motivárom a sua traduçom e publicaçom pola Estaleiro Editora, o ato pretende incentivar o debate e a reflexom sobre o político e pensador italiano.
Antonio Gramsci (1891-1937) é hoje considerado um dos teóricos marxistas mais importantes do século XX. Por outro lado, «também é um dos autores mais desconhecidos», indica a editora, que assinala que até 2008 nom se tinha feito umha traduçom galega da sua obra. A passagem da obra gramsciana para o domínio público representou para Estaleiro a «ocasiom idónea» para pôr remédio a este défice e assim contribuir para a difusom do pensamento crítico deste autor.
Gramsci foi preso em 1926 acusado de conspiraçom contra os poderes do Estado. Estivo na cadeia 11 anos, onde escreveu centos de cartas que formam, junto com os monumentais Quaderni dal Carcere, a parte fundamental da sua obra. A antologia das Cartas achega a faceta mais pessoal de Gramsci, através da relaçom epistolar com a mulher ou com a cunhada e constituem a melhor biografia possível, pois em cada carta «emerge a fortaleza moral e inteletual que caraterizou a vida deste infadigável luitador». Além disso, as Cartas representam um contributo complemento «essencial» para perceber o teórico e o militante no Partido Comunista Italiano (PCI).
A modo de complemento, a ediçom inclui um prefacio histórico que ilustra o contexto no qual Gramsci desenvolveu a sua açom política.
Esta nova obra, como as anteriores de Estaleiro Editora, pode ser adquirida nos pontos habituais de distribuiçom por apenas 10€. O livro está também disponível no sitio web da editora para a sua descarga gratuita.
+ Ligaçons relacionadas:
- Estaleiro Editora [Sítio Web]
- Estaleiro Editora [Blogaliza]
- C. S. A Revira
- Estaleiro Editora apresenta ‘Cartas do Cárcere’, de Antonio Gramsci [PGL, 19/10/2011]
