PGL – A Junta da Galiza confirmou, ainda que de umha maneira muito singular, que Anxo Lorenzo, atual secretário-geral de Política Lingüística, cobrou mais de 12.000 euros por coordenar umha exposiçom paga com dinheiro público quando apenas era um auxiliar de Marisol López, a sua antecessora.
Em resposta escrita ao parlamentar Bieito Lobeira, afirma-se que durante o governo bipartido a Junta assinou um contrato com a empresa Nortideas para o desenho, produçom, execuçom, promoçom e itineráncia de umha exposiçom sobre a língua galega na diversidade lingüística, sob o nome As nosas palabras, os nosos mundos.
O montante do contrato foi de 1.485.000 euros, dos quais algo mais de um milhom fôrom pagados em 2008, e o resto em 2009.
A Junta confirma que as retribuiçons para Anxo Lorenzo, em qualidade de coordenador, ascendêrom a 0,83% do custo total do contrato, «quantidade abonada pola empresa» que, previamente, tinha cobrado do erário. Isto deixa-nos um ordenado mínimo de 12.325,50 euros que, porém, o governo nom confirmou se incluem ou nom o IVA.
