PGL – Após a iminente mudança de governo e as novas políticas no respeitante à língua galega, uma das maiores associaçons em defesa da língua, A Mesa, anuncia para já «trabalho incansável» para que o PP nom desmantele «a protecçom jurídica do galego».
A entidade normalizadora pede ao novo governo da direita, encabeçado por Nuñez Feijóo, que nom tome «medidas unilaterais que possam criar uma fratura social» e que deixe de mentir sobre a situaçom do galego no ensino.
Lembremos que o próximo presidente da Junta anunciou que derrogará o decreto que estabelece uns mínimos de 50% do ensino em língua galega (decreto que o PP tinha aprovado em seu dia), além de reconverter toda a rede das Galescolas impulsionadas em seu dia pola vice-presidência da Junta.
Da Mesa lembram que «Galiza, com as propostas do PP, poderá vir a ser a única comunidade do Estado com língua própria que nom goze de qualquer tipo de protecçom no sistema educativo», acrescentado que «o decreto do galego no ensino foi apoiado, além de polas três forças com presença no Parlamento da Comunidade Autónoma, polos sindicatos que representam 90% do professorado, todas as organizaçons estudantis, a confederaçom dos 125 centros católicos da Galiza e a federaçom pública de associaçons de mães e pais».
+ Notícias relacionadas:
- A Mesa anuncia “un traballo incansábel” para que o PP non desmantele “a protección xurídica do galego”. A Mesa, 03 de Março de 2009.
