PGL – Entre 9 e 12 de março terám lugar em Vigo as II Jeiras sobre a Língua Galega, organizadas pola agrupaçom estudantil Comités. A AGAL vai estar representada no encontro polo seu presidente, Valentim Rodrigues Fagim.
Este evento, que contam com a colaboraçom das vice-reitorias de Extensom Cultural e Estudantes mais a de Relações Institucionais da UVigo, configura-se como «umhas jornadas baseadas na música, no humor e no debate sobre questões lingüísticas do galego». Exemplo deste carácter lúdico é o próprio lema, Dá-lhe à língua.
O programa desenvolverá-se em quatro jornadas, umha mais que na anterior ediçom. Com isto pretende-se abranger outras temáticas e dedicar mais tempo à situaçom da língua galega, explicam dos Comités. Haverá um total de sete mesas redondas e um relatório nos quais se tratará a situaçom actual do nosso idioma em diferentes ámbitos. Completa-se a programaçom com quatro actuações e três projecções.
A participaçom do presidente da AGAL será o dia 10 de março na mesa redonda intitulada Diferentes normativas, mesa na qual estará também a doutora Pilar Garcia Negro, da Universidade da Corunha.
Reconhecimentos académicos
Da organizaçom querem lembrar que estas II Jeiras têm reconhecidos dous créditos de livre configuraçom pola Universidade de Vigo ou um crédito ECTS. As pessoas interessadas podem-se inscrever de graça aravés da página web ou bem por correio electrónico em xornadaslingua[arroba]gmail.com. Também será possível matricular-se preenchendo o formulário de inscriçom ou ligando para o telefone 668 801 558.
+ Ligações relacionadas:
