Ontem apresentou-se em rolda de imprensa em Compostela a programaçom e atos ligados à celebraçom do 17 de Maio deste ano, em que se homenageia ao escritor e professor ferrolám Carvalho Calero. A Junta da Galiza, a Real Academia Galega (RAG), o Conselho da Cultura Galega, a Associaçom Galega da Língua (AGAL), a CRTVG, a Fundación Penzol, a Academia Galega da Língua Portuguesa e os concelhos de Santiago e Ferrol, entre outras entidades e instituiçons estiverom presentes no ato.
No programa de atividades conjunto há mais de 200 iniciativas de diferentes de divulgaçom da figura do homenageado. Eduardo Maragoto, presidente da AGAL, explicou a vontade de colaborar neste ano para fazer de Carvalho um património comum das galegas, insistindo nas oportunidades que o reintegracionismo de Carvalho nos oferece.
Eduardo Maragoto, presidente da AGAL, explicou a vontade de colaborar neste ano para fazer de Carvalho um património comum das galegas, insistindo nas oportunidades que o reintegracionismo de Carvalho nos oferece.
O Conselheiro de Cultura, Román Rodríguez, qualificou o valor das suas achegas como “indiscutível”, e sinalou que, por primeira vez, a mostra itinerante promovida pola Junta para divulgar a figura de Carvalho Calero, em colaboraçom com a AGAL, será exposta no concelho português de Viana do Castelo. “Um fito importante ‒em palavras de Román Rodríguez‒ polo que supóm de apertura e fomento do ámbito lusófono e de estreitamento de laços com o norte de Portugal, com o que, sem dúvida, partilhamos muitos interesses e objectivos”.
Da parte da Real Academia Galega, o seu presidente Víctor Freixanes, mencionou também a lusofonia ao destacar que “Carvalho Calero promoveu umha língua com vocaçom de futuro” e destacou a “capacidade do galego para nos contatar com a família portuguesa, brasileira e africana”.
Cumpre salientar, aliás, que a administraçom autonómica optou por desvincular-se das propostas de citar o nome do professor grafando com a norma da RAG, e que se utilizou a ediçom de Através como imagem de marca. Ainda, os eventos citados polo Conselheiro forom os organizados com a AGAL: A leitura continuada de Scórpio e a exposiçom ‘A voz presente’, que percorrerá onze concelhos galegos e um português, na que difundir a dimensom artística, humana e linguística de Ricardo Carvalho Calero e se contextualiza a sua figura e o seu legado.
Reuniom com Santalices Vieira
Na tarde de ontem, continuando com a jornada institucional, umha comissom da AGAL reuniu-se com o presidente do Parlamento da Galiza, Miguel Ángel Santalices Vieira, com o objeto de falar das atividades do Ano Carvalho. O Parlamento galego alberga a biblioteca e arquivo pessoal de Carvalho Calero.
