No passado 21 de dezembro a Associaçom Galega da Língua (AGAL) lançou no Twitter o consultório lingüístico @emgalego, que vai caminho já das quatrocentas pessoas seguidoras, mais de cem mensagens publicadas e várias dúzias de consultas respondidas. A partir de hoje, esta ferramenta vai-se complementar com um canal no Youtube em que se publicará ao menos um vídeo por semana. É convidada a participar toda pessoa que tiver um conselho lingüístico para compartilhar.
O presidente da AGAL, Eduardo Maragoto, anima a participar salientando que «para nós e para muitas outras pessoas esse conselho que nos dês é fundamental». Que tipo de conselho? «Pode ser umha palavra que começache a usar em certos ámbitos, umha frase que che pareceu importante para apoiar a tua expressom, umha pronúncia que começache a fazer bem a partir da pronúncia de determinadas palavras… o que quigeres», assinala Maragoto.
Os vídeos terám um máximo de duraçom de cento e quarenta segundos (dous minutos e meio) e poderám-se enviar ao endereço secretaria@agal-gz.org. Umha vez recebidos, publicarám-se tanto na conta @emgalego como no canal do Youtube. Recebirám prémio todos aqueles conselhos que se encontrarem entre os dez mais votados no final de ano.
No vídeo de apresentaçom, o presidente da AGAL começa esta série de dicas com umha que visa corrigir a expressom «ao melhor» propondo alternativas como «se quadra», «se calha» ou «se calhar».
