PGL – Os números da Associaçom Galega da Língua (AGAL), que poderá chegar a 500 pessoas associadas em 2013, nom tenhem deixado de crescer ao longo dos últimos anos. Isso é o que pretende mostrar um vídeo que exibe desde hoje o blogue Gente Nova da AGAL. Nele som entrevistadas 4 das 50 novas pessoas associadas ao longo do ano 2012, que exponhem os motivos polos quais decidiram primeiro aderir ao reintegracionismo para depois passar a fazer parte da associaçom.
O blogue irá publicando até 25 de julho entrevistas realizadas a novos sócios, nomeadamente jovens, umha vez que é nesta faixa de idade onde a AGAL está a ter maior incidência. “Há pessoas de todas as idades, mas chama a atençom a juventude dos novos associados numha organizaçom que até há pouco tinha fama de académica. A diversidade entre as novas incorporaçons nota-se mais no que di respeito aos ámbitos profissionais deles. Já nom é só professorado de língua; agora também há engenheiros de telecomunicaçons, bombeiros…”, asseguram os responsáveis polo novo blogue.
Motivos para o reintegracionismo que vem
Para os novos sócios e sócias, as razons para assumir o reintegracionismo vam desde as puramente práticas de um ponto de vista pessoal ou laboral até as comprometidas com a cultura galega, mas costumam vir precedidas por hesitaçons e incertezas relacionadas com a ideologia da língua que nos foi transmitica ou com certa incompreensom no ámbito em que convivemos. É um percurso comum a muitas pessoas de atual prática reintegracionista e por isso muitas pessoas poderám ver-se refletidas nas respostas fornecidas polos novos sócios.
Boas-vindas
A crescente presença das propostas reintegracionistas na sociedade terá muito a ver com que as altas de 2013 já superem as 20. Porém, nom só. A associaçom tem apostado nas mensagens dirigidas a ámbitos nom reintegracionistas e é especialmente recetiva com as pessoas que acabam por entrar. “Elas transmitem-nos novas sensibilidades sociais e por isso som perguntadas, entrevistadas, em definitivo, ouvidas: todas tenhem experiências vitais muito valiosas para a associaçom”, indicam.
Um bom exemplo disto é o vídeo que exibe o blogue, gravado na festa de boas-vindas aos novos associados que AGAL realiza anualmente. Para além disso, os novos sócios obtenhem descontos em livros, jornadas e curso on-line e, sobretodo, a satisfaçom de passar a fazer parte de umha das associaçons mais motivadas e com mais projetos em ativo com que conta a língua na atualidade. “Muitas pessoas sentem que algo se move na língua, que algo está a mudar, e querem contribuir com os seu grao de areia entrando para a associaçom”.
Visualizar vídeo “Gente Nova da AGAL (2012)
{youtube}_zlVoV8zrEc{/youtube}
