PGL – A dia 1 iniciou o primeiro acampamento urbano da Fundaçom Artábria para crianças de 5-11 anos. O prazo de inscriçom para a atividade será todo o mês, e a atividade decorrerá entre julho e agosto. O horário do acampamento será de 9h a 14h com possibilidade de ampliar o horário às 15hs contanto com serviço de comedor.
As inscriçons podem-se realizar no centro social ou escrevendo para correiodeartabria[arroba]gmail.com. O preços variarám segundo a duraçom e tipo de acampamento escolhido, e variam dos 25€ do acampamento semanal aos 80€ do mensal, ao qual cumpre somar desconto de 20% para irmás/aos inscritos a partir do segundo. Já o acampamento completo é de 120€, com idêntico desconto.
Este acampamento de verao pretende promover a atividade lúdica com umha orientaçom educativa. Optamos por umha educaçom através de relaçons de igualdade, cooperaçom entre pessoas, o ensino-aprendizagem de valores, habilidades, atitudes e conhecimentos. A integraçom das crianças desde as primeiras etapas educativas na cultura de um grupo social é «primordial», indicam da Artábria, relacionando diretamente os valores e atitudes, fomentando o respeito e a convivência.
No campamento, todas as atividades som desenvolvidas em galego, favorecendo a aquisiçom, conservaçom, cuidado e consolidaçom do nosso idioma. A língua é concebida, aliás, como idioma internacional e parte indissolúvel da nossa cultura, da nossa história e do nosso futuro.
No aspeto pedagógico, facilitará-se a livre expressom e criatividade, a espontaneidade, a liberdade de opiniom assim como a criatividade individual e coletiva através do jogo, e fomentará-se a atitude crítica e a investigaçom. A educaçom em valores e hábitos será fundamental, pois é «umha maneira de formar pessoas responsáveis e solidárias», junto com a aceitaçom da diversidade e o trabalho em grupo.
Toda a informaçom sobre o projeto, critérios pedagógicos e atividades pode-se consultar no sítio web da Fundaçom Artábria.
